… Москох ФСБ-но шен къайлахчу петарахь кхобучу Ичкерин президентан администрацин куьйгалхочунна Баталов Аптина хиира ша лаха Оьрсийчоьнан коьртачу шахьара деъна шен шича Руслан а (Гилани олура цунах гергарчара), лулахо-зуда а цхьана ницкъо дийнийла. Иза таллар ФСБ-н эпсаршка доьхуш ша Iачу юкъанна цуьнан аьтто белира, уьш Iеха а бина, цаьргара мобилан телефон яккха.
…Эццахь болийра цо ша дийна вуьсу некъ баккха.
ФСБ-н лаккхарчу хьаькамийн терго а Iехийна, НТВ-н а, шина газетан а журналисташка ФСБ-н телефонехула орца дийхира Баталов Аптис. ХIетахь йозуш йоцчу НТВ-телевизионан хаамийн редакцин куьйгалхочо Кричевский Григорийс шеен корреспонденташ бахкийтира ФСБ-но лаьцна латточу Баталовна гIо дан. Иза ша велла дIаваллалц дицлур дац Аптина…
ФСБ-н карара а ваьлла, ша вехачу Новр-ГIала цIеавеъча, Баталов Апти веха лийхира шена орцахвалларх вайна шича. ФСБ-на болх бечу эвтархочо Дениев Адама шена хаьа вайначух хилларг, аьлла, нах бахкийтира Баталовна тIе. Оцу кепехь Дениев шена ахча даккха гIортар а, шена магош доцург дар а ца лайра ФСБ-н эпсарша. Аптина хетарехь цундела а эккхийтира иза ФСБ-н полковника Дранец Игора а, кхечара а.
Новр-ГIалахь ша Iечу юкъанна, Баталов Апти теш хилира, Масхадов Асланна гергахь, цуьнан пресс-секретариатехь болх беш лелла мескарэвлахо ФСБ-н агент вуйла а, иза Москох парламент я кхийолу лаккхарчу куьйгаллин гIишло дIалаца баха нохчий вовшахтухуш вуйла а.
Тамаше дара и болх Теркибаевс ФСБ-н хьаькамашца цхьаьна беш буйла гучудалар. …Цхьа Теркибаев хилла а ца Iара оцу ФСБ-н къайленан декъахь, вара Ичкерин телерадиокомпанин куьйгалхо лаьттина Дагалаев Лоьма а.
Норд-Ост лаьцна латтийна нах байинчул тIаьхьа массех бутт баьлча эккхийтира Теркибаев Хампаша. Ткъа Дагалаев Лоьма вийра, БараевгIар Москох а бахале…
Баталов Апти шаьш дIахецале цунна массех компромат кечйира ФСБ-но – телевизионах пайда оьцура иза вовшахтухуш. Аьтто белира чекистийн Масхадовн Асланан бIаьргаш чохь иза мостагI ван…
ОРТ-каналехула Баталов дIахецар «Лефортово» набахтера а хила, цунна Iедало къинхетам а бина, бохура ФСБ-н информации тележурналистике юьллуш оцу телевизионехь болх бечу Мельник Романа. Амма бакъдолчух лачдолуш дара ОРТ-но елла репортаж…
…Оьрсийчуьра ведда Баталов Апти вехачу Ингалсехь цуьнан аьтто белира Лондоне еъна гоьяьлла журналист Политковская Анна ган. Аптис цуьнга дIакхачийра ша Дагаев Лоьма веле цуьнгара даьккхина видеотоьшалла – Норд-Остера бохам ФСБ-но кечйина операции яра бохучу тIекхачош бара и видеогайтам. Иза Iорабаккха а кхиале йийра Москох Политковская.
… Итт шо ду Баталов Апти Ингалсехь веха. Вон а дац цуьнан цигара Iер-дахар. Цундела тамаше а ду иза шеен тийна-таьIIина ваха цатигар. Стенна оьшу хьуна хайна кхераме долу тоьшаллаш гIарадаха, аьлла, хаттар а дира цуьнга Маршо Радионо. Хьалхара дакъа карадойла ду кхузахь: http://www.radiomarsho.com/content/article/25071158.html
