Хьалха леллачу ахчанашка хьажча, кху олимпиадехь толамаш баьхначу спортхошна дала кечдина совгIаташ мелла а деза ду. Дагардер вай уьш лахара хьала. Канадерчу Iедало мидалш яхьаш цIабаьхкинчу олимпхошна лур ду 10-10 эзар доллар. Штаташкахь толамхочунна дала сацам бина 25 эзар, Эрмалойчохь – 30 эзар, Финляндехь -41 эзар.
Ахчанца совгIат данне а ца до, масала, Ингалсено олимпиадехь тоьллачу шайн спортхошна. Амма ала деза, эшамехь а ца буьсу уьш, толам – иза уггаре хьалха спортхо рекламин дукътIе воккху зовкх ду, цигахь гулдо гоьваьллачу спортхочо шен миллионаш.
Кхин а цхьа цец-тидам бойла ду тоьллачу олимпхочунна ахчанаш даларан гIиллакхехь. Пачхьалкх демократина гена мел ю алсам ду цо олиапиадерчу толамах ден дозалла. Дустур вай терахьашший, мехкашкара маршонашший. Оьрсийчоь шен хIора толамхочунна дала дагахь ю 113 эзар доллар, Украина – 130 эзар, Беларус – 150 эзар, Казахстан – 250 эзар. Амма массарна тIе а палс тухуш ду Азербайджано шен толамхочунна лун долу ахча – 510 эзар доллар.
Оьрсийчоьхь Кремло къастийна барамаш боцуш, хIора махко а кхайкхийна шайн спортхошкара дала тарлучу хьуьнаран мах. ГIезалойчоьно толамца цIавеъначунна ша лур ду аьлла кхайкхийна 4-4 миллион сом. Челябинско – 3 миллион сом. Уггаре дукха соьмаш мидал яхьаш веъначу шайн спортхочунна дала дагахь бу Хантийн-Мансийн мохк – 7 миллион сом.
Бахархойн социалан хьелашца я демократица гIеметтахIоьттина пачхьалкх ю олийла а доцчу Азербайджано шен олимпан толамхочунна ах миллион доллар лучохь, капитализм а, лаахь, социализм а, ший а цхьаьна шайн лаьтта тIехь тоьлла ехачу Норвегино а, Швецино а Iуьрг даьлла кепек а шайн толамхошна луш дацаро цецвоккху, ойла йойту.
Гарехь, маршо йоцчу пачхьалкхийн шен халкъаца ца лелийча ца йолу моттаргIанаш ю олимпан ловзаршка ехкина а. Таронаш мел яккхий елахь а, Норвегино, Швецино я Ингалсено, сагIийна санна, цкъа луш хуьлучу ахчанца кура ца боху шайн спортхой – цара дерриг а дахарехь дегайовхонан аганахь ловзабо, техкабо шайна сий кхачош болу махкахой.
