Кхеташ ду, тIеман Iазап лайначу къомана, кога-ира а хIоьттина, шен дайн ламасташка юха а дирзина, даха дIадоладала цхьа хан оьшу. Олуш ма-хиллара, тIамо къонахий ца кхиабо, цо уьш хIаллакбо.
ТIебуссучу кхерамо дIахьо адамашлара тоьлла амалш, гIиллакхаш – даIаман, чагIалкхан санна, са дадой, гай дузой бен гIайгIа а ца буьту адамна тIамо. Ткъа бехха лаьттинчу шина тIамера бевллачу нахана и амалш йита а атта дац, гарехь.
Цунна делахь а, кхечу бахьанашца делахь а, тIаьххьарчу шерашкахь Нохчийчохь кест-кеста хеза доьзал боьхна, деца доьзал а битина, нана дIаяхана, я дас-нанас шайн долара а даьхна, дIатесна бераш, олий.
Къинхетам, адамалла боху синхаамаш де дийне мел долу нахалахь бовш хетало гондхьарчу хиламашка ладоьгIча.
Ялх шо долу шен йоI къиза йийна Аьрга-Хишкарчу (Серноводскерчу) 34 шо долчу цхьана нанас.
Кхо шо долу шен мерайоI йиттина, лечу хьоле яьккхира Соьлж-ГIаларчу Байсултанова Маринас.
Соьлж-ГIаларчу яхархочо Кушалиева Индирас шен хIинцца дуьненчу даьлла бер доьхкина хиллера дуьхьал шена чохь Iен хIусам а, белхан меттиг а лург.
Ала тарлой иштачу стенах Зуда, Нана, Йиша?
Дукха ду и тайпа масалш Нохчийчохь. Адамашкахь къизалла алсамъяларан бахьана долуш нохчийн юкъараллехь ира лаьтташ дай-нанойн-берийн гамоно айина проблема.
Маршо Радионо хаьттира Нохчийчуьрчу бахархошка, хаалой шуна тIаьххьарчу шерашкахь вайн дайшкахь, наношкахь лелла доцу сакхт – синан айпалла - хIинцалерчу божаршкахь, зударшкахь, аьлла.
