Исмаилов Абу. Дош
Аьлла долу дош аланза
долчу дешан лай ду.
Нохчийн халкъан кица.
Мел генара хьаьжча,
Лам санна хаалуш,
Сан дош, хьо хилалахь.
Багара дIадаьлча,
Безаман йовхо луш,
Дегнашка дижалахь.
Мичча а хьо кхачахь,
Оьзда а, комаьрша,
ГIиллакхе лелалахь.
Мецачунна – кхача,
Цомгашчунна – маршо
Хуьлуйтуш декалахь.
Ког маса хьадалча,
Сол хьалха а далий,
Нийса некъ харжалахь!
Мотт шера геланча,
Сан дагара алий,
Дуьненчу даржалахь!
