Хан мел йолу бераш дIадахар алсамдолуш ду. Австрерчу Штайермарк лаьттахь ехаш йолчу Магаева Залинех и бохам Iоттабелла итт шо ду. Цу махкахь уггаре а хьалхарчех бераш дIадахар шех хьакхаделлачарех ю иза.
Цу итт шарчохь масийтаза кхелашкахула шен дозал юхаберзон гIиртина йолу зуда дуккхаъчу адамийн бакъонашларъяран цхьаьнакхетараллех а, адвокатех а, берашна Iуналла даран хьукматех а чекхйийлина, гIо лоьхуш, амма хIинца а цуьнан кадаьлла дац цу тIехь, цо ша Маршо Радионе ма-дийцара: "Сан кхо бер 2007-чу шарахь пехийн лазарш ду аьлла, гучудаьлла. Уьш дIабуьгучу хенахь йоккхах йолу йоI 9 шо долуш, цхьа кIант 4 шо долуш, ткъа жимахниг 1 шо долуш вара. Цхьана австрихойн доьзале дIабелла бу уьш хIетахь дуьйна".
Масех шо а даьлла, Магаева Залинин йоккхах йолу йоI кхиинчул тIаьхьа иза тIеэцначу доьзалехь дар-дацарш а хилла, церан цуьнца юкъаметтигаш телхинчул тIаьхьа, иза цара тесна йитнера, бохуш дуьйцу нанас, и йоI цара араяьккхинера, цо дийцарехь.
Иза хIинца ша шена Iуналла даллал ю, меттигерчу низамашца иза маьрша лела йиш йолуш а боху нанас: "Сан йоьIан 16-17 шо а кхаьчна, цо ша шена банкехь чот а йиллина, шен ахчан дола дан иза йолаелча, цара иза араяьккхинера. Ша паркехь ю аьлла иза соьца зIене яьлча, ас тIаьхьа а яхана цIаялийра. Цара иза хIинца йоккха ю, цуьнан бакъо ю шайна луучехь лела бохура, шаьш де аьлларг иза деш яц, ца бохура шаьш иза ахча бахьана долуш араяьккхина".
ЦIаялийначу йоIа шаьш тIеэцна хиллачу доьзалехь даима а нана гамлочу кепара хIумнаш дуьйцуш, цу берийн даима а хьебилархьама болх бора шайна тIехь, бохуш дийцира шега боху Магаевас.
Цундела бераш шена херадевллера, кхелехь а цара шайна йинчу ненаца хила ца лаьа, шаьш тIеэцначу доьзалехь диса лаьа аьлла тоьшаллаш динера: "Сан йоIа соьга дийцира, цу зудчо шега хIора дийнахь "шу нана шу довда а дина, Нохчийчу дIадига гIерташ ю, цигахь шуна еттар ю, шун нанас шуна еттар, шу цуьнга дIа ца дигийта къахьоьгуш ю ша" бохуш, хIумнаш дуьйцура бохуш. Цундела шаьш со гича а кхералора бохура цо".
Магаеван цIайирзина йоI хIинца марехь ю нохчийн доьзалехь. Ткъа жимах волу 14 а, 11 а шераш долу ши кIант ур-атталла шена гайта а ца гойту, боху Магаевас: "Сан ши кIант цара суна гойтуш а вац. Цкъа ши шо делира цара суна и шиъ ца гойтуш, цул тIаьхьа ах шо делира. Уьш суна цIаберза а, тIебахка а лууш бацахь, ур-атталла цу шина кIантана гайта лаьара суна, со цу доьзалехь царна Iуналла дечара цаьрга ма йийцара во стаг йоцийла, со и шиъ везаш лелаш юйла".
Австрехь кхелашкахула шега шен бераш цIадерзалург хиларх тешам байна йолу Магаева Залина хIинца Страсбургерчу адамийн бакъонийн кхелехула къовса Iалашо йолуш ю шен бераш кхион а, царех марзо эца а бакъо.
Итт шарахь берех хьоьгуш йолу ша тешна ю, йозуш йоцучу дуьнанаюкъарчу кхело шен гIуллакх цхьангге а озабезамаш а ца беш, нийсонна тIехь толлург хиларх боху цо.
