Мачаликашвили Темирлан вийначу Гуьржийчоьнан ницкъаллин структурийн белхахошна тIаIзар дар доьхуш митинг дIаяьхьна Дуисехь ПIаьнгазарчу бахархоша. И жима стаг стохка ГIура-баттахь, коьртах герз тоьхна лазийнера, иза вижина Iуьллучу хIусаманна чулилхинчу полицин лерринчу тобанан белхахоша.
ТIаьхьо 19 шо долу Мачаликашвили велира клиникехь, кхин кхетамчу а ца вогIуш. Гуьржийчоьнан ницкъаллин структурийн белхахоша чIагIдора, иза террорхо вара бохуш.
Дуиси эвлахь митинг вовшахтоьхнарг вара Темирланан да Мачаликашвили Малхаз. Цу акцехь дакъалоцуш вара Сарилидзе Заза. И стаг ву шен 16 шо долу кIант вер нийсонца таллийта гIерташ араваьлла.
Цунна тIехIиттинчу Гуьржийчуьрча бахархоша Iаткъам бар бахьана долуш, шайн даржаш дитина министрийн кабинетан декъашхоша, шайна юкъахь премьер-министр а волуш.