Хатуев Iабдул - Хьамид. Хьо стенга гIур ву?
Жималла ягаеш,
Хьо Iеса лела,
Эхь хетац пайдечу
Нахана вела.
Дарж долчух кхоьру хьо,
Мискачух воьлуш.
Ахча дерг хетало
Массарел тоьлуш.
Нахана дехкина
Ду моьтту кешнаш,
Беллачех ца вешаш
Олу ахь дешнаш.
Дицделла кхузахь хьайн
ХIусам хир юйла,
Цкъа мацца кху керта
Хьо вохьур вуйла.
Цамгаро лаьцна хьо
Виллича метта,
Я хотIе вожийча,
Ца торчче кхетта,
Ахь Деле, кхералой,
Мохь-орца олу,
Хьайн миска са марзлой,
Дехаре волу.
Къинхетам болуш верг
Орцаха ваьлча,
Вайн Делан пурбанца
Хьо кIелхьар ваьлча,
Хьо Дала диначу
Дикнах ца кхета
Айхьа вайн Дела а
Iехийна хета.
Хьан хьаькам ву хьуна
Сийдолу Дела.
Цо хецна витна хьо,
Ма луъу лела.
Ма хаа Цунна хьо
Гена гIур воций
Шена тIе ваха бен
Хьан меттиг боций.
