Хатуев Iабдул - Хьамид.
Синмехалаш
Дедайша лардинарг сийца,
Бендоцуш дIатесна вай,
Хиллачийн къайленаш йийца,
Сатуьйсуш къежбелла дай.
Ламанца бIаьвнийн зил тилла,
Мел гучохь – къежделла чурт.
Ма къиза, ма экам хилла,
Нохчийчоь, хьан турпал сурт.
ТIулгаш тIехь йозанаш деза,
Заманаш ялхаеш кхин.
Муридийн назманаш хеза,
Беснеш тIехь Iийдало хи.
Деза вай иймане дерза,
Вон-дика цхьабосса ловш.
Олучохь – массаьрца мерза,
Лелачохь – массаьрца товш!
Дагчуьра вайн маьлхан кешнаш,
Дай цIераш яха йиш яц,
Ца лардахь дайн шира дешнаш,
Хиндолчо вай лардийр дац!
Ийман-ислам, синмехалаш,
Вайна дешел сийлахь ю,
Уьш вайн дегнийн къонахалла
Узуш долу терза ду
