Нохчийчоьнан куьйгалхочо Кадыров Рамзана лору республикера хьал шен аьхналлехь чIагIделла хилар. Цо харц хаам бу аьлла тIемалоша Оьрсийчоьнан эскархойн коврана тIелатар дина бохург, иза баржийначарна таIзар даре а кхойкхуш.
Хьалхо социалан машанашкахь видео яржийнера, Хьалха-Мартанна гергахь тIемалоша ницкъаллин структурийн белхахошна тIелатар динча санна яьккхина йолу. Хаам бира, гарехь, дуьйцург Оханан-беттан 22-чохь Рошни-Чу эвлан йистехь машенийн коврана герз тохар ду аьлла.
"Республикехь дерриг а дика дуй хаьа массерна а", - чIагIдо Кадыровс. Цундела цецвоккху Нохчийчохь тIеман тобанан декъашхой лецна бохучо. "Интерфаксо" дийцарехь, "бакъонца йоцу тIеман тоба кхоьллина хилла Соьлж-ГIалахь кхушара Iай 1998-чу шарахь винчу Нохчийчуьрчу вахархочо. Цу тобанна юкъахь, иза ша воцург, хилла кхин а 8 стаг".
Цу агенталло дийцарехь, оцу нахера герз а, гранаташ а яьхна, ткъа иштта царна дуьхьал бехктакхаман гIуллакх долийна бакъонца йоцу тоба кхолларна а, цу юкъахь дакъалацарна я бакъонца доцу герз эцарна а, иза латторна а.
И тоба лаьцна Iедалша, Рошни-чохь тIелатар дина дац бохуш а долуш. ТIемалой хила тарлун нах лецна хила мега эскархошна тIелатар динчул тIаьхьа. ТIаьхьо хаам гучубелира, церан хьалханчо аль-БагIдадина ("Исламан пачхьалкх" олучу тобан хьалханча) муьтIахь хила дуй бууш оьрсийн маттахь кехат яздина хиллерра аьлла. Цо иза хIунда дина, мича дахьийта дагахь хилла иза и кехат дуьйцуш дац.
Кегийрахоша лелориг цхьа а юкъаметтиг йолуш дац цхьана а идеологица, аьлла хета Прагерчу Карлов университетера политикехула а, кхерамазаллехула а экспертана Сулейманов Эмилана.
"Иза могIарера дуьхьалонан революцин идеологи ю, карарчу хенахь хIинца а "модехь" йолу", - боху цо.
Цуьнца цхьаьна, МГИМО-н (Москох халкъашна юкъара юкъаметтигийн пачхьалкхан институт) Iилманан белхахочо Ярлыкапов Ахьмада варе до: йохийнарг ю билггал территорина тIера "Исламан пачхьалкхан" структура. Цундела церан керла тIаьхьалончаш гучубовла дукха хан яц, нагахь Iедалша оьшуш йолу эвсара гIулчаш ца яхахь.
"Шемахь а, Иракъехь а шаьш дуьтур ца хиларх кхеттачу "Исламан пачхьалкхо" шен маша бузуш бу дерриг а дуьнентIехь, Оьрсийчохь а цхьаьна. Тахана Къилбаседа Кавказехь, берриг а махкахь санна, жигаралла гойтуш церан маша бен бац", - дуьйцу эксперто.
Дагадоуьйту, хIара шо доладелчхьана Дагестанехь гучуяьккхина "тийна-таьIна ладоьгIуш Iаш йолу" "Исламан пачхьалкхан" агIончийн 7 тоба.
