Кху деношкахь Шемахь байинчу оьрсийн эскархойх цхьаннан цIе билгалъяьлла, иза ву Волгодонскера 27 шо долу Никонов Кирилл, чIагIдо "Блокнот Волгодонск" хьостано. Хаамийн гIирсашкахь яьржина информаци бакъйина веллачуьнца цхьана школехь дешанчу бераша а. Цара бахарехь, меттигерчу лоьмар 9 йолчу школехь дешна ву иза. Иза чекхъяьккхинчул тIаьхьа тIемало хила Iалашо яра цуьнан. Зуда а, ши бер а дисина цунах аьлла, дийцина Никоновца дешначара.
РБК агенталло яздо, цу кIентан нана цуьнан дакъа цIа дан Москва яхана бохуш. Никонов Кирилл мини тIехь иккхина аьлла, иза валар тIечIагIдина цуьнан доттагIчо Зайченко Еленас а. Цо бахарехь, шоьтадийнахь дIавуллуш ву иза Подмосковьерчу Редина эвлахь.
Еаридийнахь "Ведомости" хьостано Iорадаьккхира, шайн тIеман-дипломатин хьостана а, Iарбойн керлачу хаамийн Al-Masdar News сайтана а тIетевжина, Шемахь кхоъ оьрсийн эскархо велла, шинна чевнаш йина аьлла.
Цхьадолчу хьосташа дийцарехь, дахначу кхааридийнахь Джуринехь минаш тIехь лилхина уьш, вукхара бахарехь, Аджас олучу меттигехь кIело йина хилла царна. Ишта билгалдоккху, юьйцург ши инцидент хила а тарло бохуш, хIунда аьлча, оцу шина юьртана юкъахь 60 киламетар ю.
Оьрсийчоьнан тIеман министралло тIе ца юьту Iораяьлла информаци.