Цхьа кIира хьалха Нохчийчоьнан куьйгалхочунна Кадыров Рамзанна хьалха гечдар дийхира гоьваьллачу блогеро Тилэкс Сашас, цунах тера волчу турпалхочо лаахь а, ца лаахь а рэперан Тиматин Black Star лейблца юкъарлонаш лелор тIедожош, забаре клип яккхарна.
Пародехь дакъалоцурш бакъболчу нахах тарлахь, ларамаза нисделла ду аьлла, билгалдаьккхинехь а, Кадыровх терачу маж йолчу стага "Дуй хьуна" бахахь а, цуьнан цIе йоккхуш яц клипехь. ХIетте а гечдар дехийтира блогере. Цо дийцарехь, цуьнца зIене ваьллачу нохчийн "Грозный" телеканалан директоро Дудаев Ахьмада доллучух а кхетийра иза.
"Дуьненаюкъараллехь а вевзаш волу Кадыров Рамзан юкъахь волуш, беламе видео арахецарна тхайгара ледарло яьллийла хаьа тхуна", - аьллера артисташа.
Цул хьалха "доллу нохчийн къомана хьалха" къинтIера довлар дийхира ингалсан блогеро, Bald and Bankrupt You-Tube-каналан авторо, нохчийн зудаберех "цыпочкаш" аларна. Гечдар доьхуш, видео цо дIаязйинчу хIусамчохь пенах кхозуш ду Путинан а, Кадыровн а суьрташ.
Де хьалха Chp Chechenya Instagram-пабликехь шиммо дехар дина Кадыровга, "хьаштдоцурш яздарна" шайна къинтIера валахьара аьлла. Цу шиннах цхьаммо дIахьедо, шена тIе нах баьхкинера, цара "тIекхиина ша массо а хIуманна" аьлла.
Пачхьалкхан "Грозный" телевизионан директорца, нохчийн куьйгалхочун гIоьнчаца Дудаев Ахьмадца къамел хилира "Кавказ.Реалиин". Хаьттира, нах дохкобахар хьан белхан декхаршлахь дуй аьлла.
- Гечдар доьхуьйтучохь хьо коьрта стаг ву? ТIаьххьара гучубуьйлучу хаамашка ладоьгIча, ишта ойла кхоллало-кх…
- И бохург хIун ду? Ишта урхалла ю?
- Блогеро Тилэкс Сашас бахара, хьо шеца зIене ваьллера, цул тIаьхьа шегара даьллачух кхета а кхетта, дохковелира ша. Кадыров Рамзанах тера турпалхо ву цо а, цуьнан накъосташа а рэперх Тиматих яьккхинчу беламечу клипехь.
- Оха цхьаьнга а дехарш ца до, гечдар деха бохуш. Йа цхьа а бертаза декхаре а ца во. Низамашкахь тхан бакъо ма яц, бертаза стаг дIа а хIоттийна, къинтIера довла бахийта. Дуккхаъ а къаьмнаш дехаш пачхьалкх ю хIара, хIоранна а шен-шен гIиллакхаш а, ламасташ а ду. Цундела кест-кеста нисло, оцу къоман ламасташ цадовзарна, цхьаммо цхьаъ олуш, йа цхьаъ долуьйтуш шегара. ТIаккха цу стаге телефон а тухий, масала, оха олу: "Лараме хьенех-минех, тхан гIиллакхаш а, ламасташ а, тхайн дайн леларш а ахь аьшнашдо хьайгара далийтинчуьнца, тхуна цатов хьан лелар, йа ахь аьлларг". ТIаккхахула цуьнгара иштаниг ца далийтархьама, оха хьоьху тхайн ламасташ. Цул тIаьхьа доллучух а кхеттачу стага, шена къинтIера довла олу.
- Селхана Chp_Chechenya Instagram-аккаунте яьккхинчу видео тIехь къинтIера довлар дехначу шина кIантца а цхьаъ зIене ваьллера? Хьо вара иза?
- Гой хьуна, и нах Нохчийчохь бехаш ца хилча, оха муха тIедожор ду царна нуьцкъаша гечдар дехийтар?! Низамаша могуьйтуш хIума ма дац иза… Дера Оьрсийчоьнан массо а хIуманна тIехь бакъонаш а йолуш субъект ю Нохчийчоь, хIара регионехь тхан векалт ю.
- ХIаъ, оцу нахаца цхьаъ зIене а вуьйлуш, бертаза камерана хьалха уьш хIиттош санна ду-кх хIара сурт.
- Цхьана агIор ишта дан а ду иза. Цаьрца цхьаъ зIене ваьллера, уьш кхето дагахь. Цара лелориг нийса доций, товш доций а дIахаийтира. Хьуна нийса хета цара лелориг, йа цара дийриг, нагахь санна цара сий дойуш къамелаш деш хилча?
- Со дешан маршонехьа ю.
- Делахь тIаккха хьо а тхан ламасташ а, гIиллакхаш а лоруш йоцуш санна нисло-кх. Мегар дац кхечу къаьмнийн Iадаташ аьшнашдан, уьш ца лара. Дуккха а бу вайлахь Iилма а доцуш, кхетош-кхиийна нах. Нагахь санна, оцу стагера ледарло яьллехь, цо ша кхетта, шена къинтIера довла аьлча, суна-м ца го цигахь вон хIуммаъ. Тхан прокуроро ма оллура: дерриг а низаман гурашкахь ду.
- Iадатах валар а ду низам дохор санна.
- Нагахь санна, оцу стага, масала, цхьанна сий дойуш хилча, цуьнан доьзалх, гергарчу нахах, ненах, йишех, дех хьаштдоцург а аьллехь…
- И сий дайар ду аьлла, хеташ хилча, кхеле хIунда ца довлу шу?
- Нагахь санна, оха белла кхетам оцу стага тIе ца лоций, цул тIаьхьа довлу тхо кхеле.
- ТIаккха, муха хета хьуна оцу "гечдарх" массо а кхаьрдаш хилар? Мем хилла дIадахна иза.
- Шуна шайн агIо бен ца го. Дуккхаъчара олу, дика юкъадаьккхина хIума ду, нахе дага мел деанарг вовшашка ца яздайта а, ца бахийта а. Мелхо а наха баркалла боху-кх, тхуна.
- Стеган дешан маршо хьашар ду ца олу бахархоша?
- Дешан маьршо йохор хир дара иза, нагахь санна, оха бертаза бохуьйтуш хилча.
- Масала, Нохчийчу веанчу ингалсан блогеро Бенджамина, (Bald and Bankrupt You-Tube-канал) нохчийн къоме гечдар дийхира, шен видео тIехь нохчийн мехкарех "цыпочкаш" аларна. Иза хиъна Iачу чоьнан пенах гуш ду Путинан а, Кадыровн а суьрташ. ХIунда?
- Сан кабинет чохь вара иза.
- Хьан кабинет чу стенна веанера иза?
-Ас кхайкхина дела.
- Ахь геччдар дехийта валийнера иза?
- ХIан-хIа, тхайн гIиллакхех, Iадатех, ламастех дерг довзийта кхайкхина вара иза ас. ТIаккхахула хьо цхьана махка, йа регионе воьдучу хенахь, церан исторех, Iадатех, леларх хаарш хилийта хьайгахь элира ас. Доллучух а иза дика кхийтира. Тхан зударийн сий ша дайина хиларх кхеттачу цо, доллу нохчийн къомана хьалха гечдар дийхира шена.
