Бисултанов Апти
БIаьхочун тезет
Бараман га лаьцна доцу вешин куьг а,
Кошан борза тIе диллина доцу йишин куьг а,
ЦIий а мискана хьожа а, ткъарш-ткъиршанехь
Когаш кIеллахь кегло IиндагIаш а. ⠀⠀
Саьхьарчу гIамаршкахь
ДогIанан тIадамаш санна,
ХIоранна а
Сих а дегIах а худало
Дуьненчохь тIаьхьа мел йисначу
Тийналлин тIаьххьара тIадамаш а.
Синметтехь кеглучу
Лазаман гаьргаш а,
ХIораннан бIаьргашка хIиттина лаьтта.
Матта тIе кхачале
Массо а дош кхачадаларна,
ХIораннан а
Легашка хIиттина лаьтта
НеIалт а,
Дагахьбаллам а.
ДоIанна кховдийна куьйгаш а,
Герза тIе кхевдийна куьйгаш а
Дуьненан эхартан дозанехь.
2003
