Бакъоларйаран "Мемориал" центран хиллачу бакъоларйархочо, гIебартлойн-балкхаройн йукъараллин "Жьэгу" (Кхерч) организацин декъашхочо Бегретова Ольгас къайлахчу сервисашна дуьхьал чукхачийна иск Нальчик гIалин кхело дIатеттина. Бегретовас тIедожийнера шен хьокъехь оперативан-лехаман барамаш барх хаамаш шега кхачон республикера коьрта урхалла дуьхьалхилар низамашкахь дац аьлла къобалдар. Минеральные Воды гIаларчу аэропортехь бертаза суьрташ дехира цуьнан, пIелгийн лараш а, биологин материал а ийцира, цуьнгара телефон а дIайаьккхинера.
"Низамо Iалашйен пачхьалкхан йа кхечу кепара къайле йолу хаамаш нахала а ца бохуш" аьтто бацара къайлахчу сервисийн дехарна жоп дала аьлла, хьесап дина кхело хаамбина адамийн бакъонаш Iалашйечу "Мемориал" центро. Оцу сацамна латкъамбан лерина йу Бегретова.
2022-чу шеран лахьан-баттахь хилла йу инцидент, Бегретова Истанбуле йоьдучу заманчохь. ТIаьхьо Къилбан тIеман гонашкара Талламан комитете йаьллера иза шайгарчу бакъонел совбоьвллачу дозанхойн хьокъехь бехкзуламан артиклехула талламбар доьхуш, цигара кхаьчна жоьпашна а латкъамбира цо.
Стохка гIуран-баттахь Пятигорскера гарнизонан тIеман кхело йуха а дуьхьалойира Бегретована, иза "дозанхоша контроль йечу хенахь гучуйаьллера, хIунда аьлча оперативан Iалашонашкахь хиларна" аьлла.
Цул тIаьхьа Бегретовас дIахьедар дира ГIебарта-Балкхаройчьура къайлахчу сервисийн урхалле, цу тIехь цо тIедожийнера оперативан-лехаман барамаш шен хьокъехь дIахьочу заманчохь шех лаьцна бина хаамаш шега схьакхачабе аьлла. Урхалло дуьхьало йира, оперативан-лехаман барамаш дIабаьхьна бац аьлла. Оцу дуьхьалойарна кхелехь латкъамбан гIоьртинера бакъоларйархо.
- 2022-чу шеран лахьан-беттан 18-чохь Минводера аэропортехь паспортан контролехь хеттарш динера Бегретове, шайгара кехаташ а ца гойтуш, хетарехь, къайлахчу сервисийн шина белхахочо. Цо бечу балхах, гергарчу нахах, кхечу пачхьалкхе йаха Iалашо хиларх, иштта цо йоьшучу книгех лаьцна хеттарш динера цуьнга, къаьсттина Акунин Борисан кхолларалла муха хета баьхнера.
- Цул тIаьхьа Бегретован куьйгийн пIелгийн лараш эцнера, суьрташ даьхнера цуьнан, багара тIуналла йаьккхинера, дуьхьало йан цуьнан бакъо йац а бохуш. Иштта белхахочо схьайаьккхинера цуьнгара телефон, иза а эцна кабинет чуьра араваьллера иза, цхьа хан йаьлча йуха а веана, телефон дIайеллера.
- 2022-чу шеран гIадужу-баттахь ГIебарта-Балкхаройчуьра бакъоларйархой меттигерчу Iедалхошка бевллера регионера мобилизаци сацайе, тIамана дуьхьал кхайкхамаш бен Нальчикехь лецна зударий жоьпалле ма ийзабе бохуш, тIедожош. Оцу кхайкхамна куьйгаш йаздинчарлахь йара Бегретова Ольга а.
- 2022-чу шеран зазадокху-баттахь Кавказ.Реалии сайто йаздира, Оьрсийчоьно Украинехь бечу тIемашна дуьхьал болчу Кавказера нехан цIераш анониман телеграм-каналаша нахалайохуш йу аьлла. Каналашкахь йаржайора церан цIераш, суьрташ, церан агIонийн линкаш, иштта сийсазбеш, кхерамаш туьйсура тIамана дуьхьал церан хьежамаш хиларна. ТIелатарш цара динчарлахь йара Бегретова Ольга а – хетарехь, бахьана хилла хир дара социалан машанашкара цуьнан аккаунтера украинхойн байракхан сурт.
- ГIалгIайн политикан тутмакхехьа, жигархочуьнгахьа Саутиева Зарифехьа гIо дохуш хIитточу акцешкахь дакъалецира Бегретова Ольгас. Саутиева лаьцна йу гIалгIайн дуьхьалонан лидерийн гIуллакхехула – уьш бехкебо 2019-чу шарахь Нохчийчоьнца дозанаш хийцарна дуьхьал хIоттийначу митингехь Iедалан векалшна дуьхьал ницкъ баккхарна.
