Белгород кӀоштарчу Валуйскан кӀоштан коьртачу дарбан цӀийне кхачийна 37 шо долу меттигера вахархо, туьтан даьIахкаш кегйина, хаамбина Astra агенталло, хьосташна тӀе а тевжаш. Цул хьалха иза лаьцнера "Ахматан" эскархоша, Оскол хи тӀехула долчу тӀайх видео йаьккхина аьлла.
Хьостано дийцарехь, чевнаш йина вахархочунна, ша лаьцна вуьгучу эскархоша хаьхкина йуьгучу машенчуьра араиккхича. Иза лачкъийна хиллера, Валуйскан кӀоштара кхеран тIеман дакъошка куп тоьхна меттиг видео тIе дIайазйина аьлла, шеконаш хилла. Инцидент хилла гезгамашин-беттан 27-чу дийнахь.
Белгородан кӀоштахь "Ахмат" тобанан эскархоша стаг лацарх лаьцна официалехь хаам бина бацара.
- Стохка гIадужу-баттахь украинхошна гӀо деш хилла Белгородера волонтер Демиденко Александр лаьцнера, стенга вуьгу а ца хоуьйтуш дӀавигира иза нохчийн ницкъхоша, цул тӀаьхьа изоляторе хьажийра. Охан-беттан 8-чу дийнахь гучуделира Демиденко Белгородан кӀоштарчу номер 3 йолчу СИЗО-хь веллийла. ТаӀзарш кхочушдаран федералан урхалло дӀахьедира, стаг валаран бахьана ша-шена тӀе куьгаш дахьар ду аьлла.
- СИЗО-хь веллачу стеган доьзало полице хаам бира, цуьнан машен йайна хиларх. "Ахматан" эскархоша лачкъочу хенахь иза цу чохь хиллера – иза лацаран тIеман полици бехке йац аьллачу талламхойн аьтто ца баьллера эхашарахь цуьнан машен карон.
- Марсхьокху-беттан йуьххьехь Оьрсийчоьнан "тIеман корреспонденташа" бехкебира "Ахматан" эскархой Белгородан а, Курскан а кIошташкара дозанашкахь бехачу бахархошца девнаш дахарна. Ишта тIемаш боьлхучу хьалхарчу могIаршкахь уьш цахиларна а, цига хьовсийна бара уьш Харькован кIоштахь "буферан зона" кхолла.
