Шарип Цуруев
Нохчийн мотт
Акха яр санна, и ца баьлла бацалахь,
Боьжна бац стиглара, эцна бац базарахь,
Цхьаьнггера юхалург баьккхина бацара –
Кхоьллина хилла и вайн дайшна азаллехь.
Ас лору дуьнен чохь мел долу меттанаш,
Нохчийн мотт – гуттар а сан оьзда дозалла,
Iожаллин цамгаро дIалаьцна, меттахь Iаш,
Цу маттахь дийр ду ас весет а доьзале.
Цу маттахь нанас со дуьххьара хьаьстина,
Цу маттахь некъан дош дадас а кхайкхийна.
Цу матто, – уггаре гергарчу сан сина –
Сан, генахь цхьа висча, дог-ойла айина.
