Францин чоьхьарчу гIуллакхийн министрана Дарманен Джеральдана а, Лакхарчу Вьеннан префект хиллачу Морси Сеймуранна а, Парижан полицин хиллачу префектана Лаллеман Дидьенна а арз динчул тIаьхьа оцу пачхьалкхехь талламаш болийна. Нохчийн мухIажарна Гадаев Мохьмадана 2021-чу шарахь депортаци йарца доьзна ду и, йаздо AFP агенталлина тIетевжина Le Parisien ресурсо.
Гадаевна депортаци йечу омрана куьгйаздинарг Дарманен ву аьлла бу хаам – оцу тIехула иза бехкево Оьрсийчоьнан а, Нохчийчоьнан а Iедалхошца юкъарлонаш долуш ву аьлла. Гадаев "бертаза лачкъочу хенахь юкъарло лелийна" аьлла, шеконаш ю хьаькамех.
Карладоккху, Гадаев вара "Барт Маршо" организацин а, "Европера нохчийн Ассамблейн" а декъашхо а. 2021-чу шеран оханан-беттан 8-чохь куьгйаздан иза полицина тIевеъча, депортацин набахте хьажийра иза Францихь. Зазадокху-бутт бовш цунна депортаци йар юкъахдаьккхинчу кхело тIедиллинера цунна кест-кеста тIеван. ХIетахь адвокатан аьтто хилира, Нохчийчохь Гадаевна тIехь гIело хьоьгург хилар тIечIагIдан.
ХIетте а, 2021-чу шарахь иза пачхьалкхера араваьккхира – Гадаевс дуьхьало йеш шен гехь урс а теснера. Оьрсийчу дIакхачийна ши де даьлча нохчийн полицино лачкъийра иза, цул тIаьхьа герз даьккхинера цуьнгара аьлла, шайггара долийначу гIуллакхца лаца а лецира. 2021-чу шеран товбеца-баттахь 18 бутт кхайкхийра цунна шогачу хьелашкарчу колонихь баккха.
Гадаевн хIусамнанна а, бакъоларйаран Amnesty International организацина а тIетевжина Le Parisien гIирсо йаздарехь, стохка марсхьокху-баттахь маьршаваьккхира Гадаев, карарчу хенахь "тергонехь латтош ву" иза, Оьрсийчуьура дIаваха йиш а йоцуш.
- Кхул хьалха Гадаев лаьцнера 2020-чу шарахь, францхойн хьехархо Пати Сэмюэль вийначул тIаьхьа бакъоларйаран органаша нохчашна тIехь терго латтор чIагIдинчу заманчохь. ХIетахь бира дуьххьара иза пачхьалкхера аравоккхуш сацам, амма цкъа аьтто ца хилира церан, тутмакхах коронавирусан ун хьакхаделла.
- 2023-чу шеран чиллин-баттахь Кавказ.Реалиино ма-дарра йаздира, Шемахь тIом барна Францихь набахтехь хан токхучу Нохчийчуьра О.Зеламхех лаьцна. Стигалкъекъа-баттахь маьршаваккха везаш ву иза, ткъа цуьнан гергарчаьаргахула иза хоьттуш лела нохчийн ницкъахой даймахкахь.
- ТIаьххьарчу шерашкахь Францино депорт йина иттанаш нохчийн мухIажаршна, республика йозуш цахиларехьа къийсам латтийнарш бу царлахь, йа Кадыровн Рамзанан рожах зен хилларш бу, царна Оьрсийчохь лаьтта кхерамаш тидаме ца оьцу, чIагIдо Comité Tchétchénie а, Habitat-Cité а векалша. Церан билггал долу терахь хууш дац: депорташ йинчу нехан гергарчара шайга орца дехна меттигаш бен ца йевза царна.
