Дагестанерчу бусулба нехан Динан урхалло дӀадаьккхина фатваш а, маслаӀаташ а деш долу дакъа. Мехкан муфтийна Абдулаев Ахьмадана хетачуьнца йогIуш йоцу никъабаш лелор дехкарца позици йовзийтира хьалхо фатвийн декъо.
Фатвийн дакъа дӀадаккхарх лаьцна хаам бо муфтиятан телеграм-каналехь. Билгалдоккху, Абдулаевс белхахошца дага а ваьлла, цара динчу хьесапашна тӀе а тевжаш, сацам бина хилар. ДIакъовлар доьзна "оцу декъо шен-шен заманахь" дала деза жоьпаш луш цахиларца. И бохург хIун ду, билгалдаьккхина дац.
Товбеца-беттан 1-чу дийнахь Абдулаевс дӀакхайкхийра фатва (цхьаболу сацамаш а, гӀуллакхаш а бусалба динан норманашца догӀуш хиларх лаьцна теологин жамӀ) арахецарх лаьцна, никъаб йоьхкуш.
ШолгӀачу дийнахь муфтиятан фатван урхалло дӀахьедира, шайна "тоъал бух ца го никъаб лелор юкъара дехкарх лаьцна сацам бан" аьлла. "Цхьадолчу хьелашкахь, кхерамазаллин бахьанашца меттигера никъаб лелор дехкар юкъадаккха тарло", - аьлла ду хаамехь.
Кхин а цхьа де даьлча, Дагестанан муфтийн гӀовсо Салимов Ӏабдуллас дӀахьедар дира, никъабаш лелор "ханна дехкар" юкъадаьккхина хиларх лаьцна - "билгалбаьхна кхерам дӀабаккхалц, теологин керла жамӀ даллалц". И сацам, цо бахарехь, тӀеэцнарг ву республикин муфтий Абдулаев Ахьмад. Муфтиято билггал муьлха кхерам бу вай буьйцург а, муьлхачу хена чохь уьш дӀабаха беза а билгал ца даьккхина.
- Лахьан-беттан 3-чу дийнахь Къилбаседа Кавказерчу бусулбанийн координацин центро дӀахьедира, "Оьрсийчуьрчу кхузаманан хьелашкахь" никъаб лелор буьззинчу барамехь юкъахдоккхуш. Оцу документо дӀакхайкхийна ду никъаб "бусалба нахана зенаш деш, динашна юкъарчу а, къаьмнашна юкъарчу а юкъаметтигашкахь барт ца хиларна кхерам болуш" йу аьлла. Амма хьахийна дац цхьа а никъаб лелон ца магийна "билгалбаьхна кхерамех".
- Товбеца-беттан 4-чу дийнахь Кхарачой-Чергазийчоьнан бусулба нехан Динан урхалло юкъадаьккхина цхьана ханна никъаб лелор дехкар. Иштта дӀахьедар дина Къилбаседа Кавказерчу бусулба нехан координацин центран куьйгалхо а волчу республикин муфтийс Бердиев ИсмаьӀала.
- Мангал-беттан 23-чу дийнахь Дагестанехь герзашца тӀелатарш дина полицин белхахошна а, килсашна а, синагогашна а. Цул тӀаьхьа Оьрсийчоьнан Ӏедалан векалша дӀакхайкхийра, республикехь яьржина радикализм ю аьлла. Цуьнца цхьаьна юха а чӀагӀделла никъабаш лелор дехка мегаш хилар дийцаре дар – цу юкъахь Дагестанан куьйгалхо а ву. Хууш ду, тӀелетарш динарг божарий хилар, амма цхьахверг царех никъаб йоьхна къайлавала дагахь хиллера бохург официалехь тIечIагIдина дац.
- "Кавказ.Реалии" сайто къамел динчу говзанчаша шеконаш кхоллало, тахана бусулба нехан Динан Урхаллаша бусулба нехан бакъонаш юьззина гайта а, царна тӀеӀаткъам бан а йиш хиларх.
