Арахьарчу агентийн реестре йазйина юстицин министралло "Iазапашна дуьхьал Команда" (КПП). Оцу хаамах лаьцна хиъна марсхьокху-беттан 30-чохь, бакъоларйаран организаци кхоьллина 23 шо кхочуш. Къилбехь а, Кавказехь а шен филиалаш йолчу "Командо" кхин а дIа а бийр бу шайн болх.
"Тахана хаамбина тхоьга, марсхьокху-беттан 23-чохь юстицин министралло арахьарчу агентийн реестре тхаьш дахарх. "Iазапашна дуьхьал Команда" урхалло дIатоьхна хьалхо вовшахйаьккхинчу "Iазапашна дуьхьал Комитетах" НКО-н арахьарчу агентех тептарехь", - аьлла ду "Командин" хаамехь.
Бакъоларйархоша дIахьедина, юстицин министраллин сацамна шаьш латкъам бийриг хиларх а, шайн материалашна маркировка йарх низамаш лардеш кхин дIа а болх бийр бу шаьш аьлла.
"Оцу статусо мел новкъарло йийр йу балхана башха къаьсташ дац, хIунда аьлча, уггар а хьалха хьаькамашна Iаьржа билгало йу иза. Хьалха а санна гIело хьегначарна кхин дIа а гIо латтор ма дуй оха", - аьлла бакъоларйаран организацин куьйгалхочо Бабинец Сергейс Кавказ.Реалиин корреспондентаца хиллачу къамелехь.
Хьалхо "Iазапашна дуьхьал Командин" цIе йара "Iазапашна дуьхьал Комитет" – и организаци 2022-чу шеран мангал-баттахь кхоалгIа арахьара агент лерира, и сацам йухабаккхийта ницкъ ца кхечира бакъоларйархойн. ХIетахь Краснодарера КПП-н филиалехь толлуш дара полицихь ницкъбина 30 гIуллакх Къилбаседа Кавказехь – 22. "Комитет" дIайаьккхира, цуьнан метта керла "Iазапашна дуьхьал Команда" аьлла йукъаралла схьайиллира, цо кхин дIа бехьира шайн болх.
- Кху шеран бIаьста КПП-н филиалашкахь цхьа могIа талламаш бира, Къилбаседа ХIирийчохь долийначу бехкзуламан гIуллакхна тIехула. Лаха Новгородехь ницкъахой организацин офисе баьхкина ца Iаш, кхаа юристан цIахь а цхьана хиллера. Экстремизмана дуьхьало латточу Центран белхахоша юристан Садовская Ольгин ноутбук а, телефон а, таллархойн тоьпан 30 патарма а дIабаьхьира, цуьнан хиллачу хIусамден дара уьш. "Командин" офисера ницкъахоша масех флешка даьхьнера.
- Оханан-беттан 14-чохь Къилбаседа Кавказера Ставрополь-мехкан Пятигорскера филиалехь талламаш бан баьхкира полисхой. Изза Къилбаседа ХIирийчуьра бехктакхаман гIуллакхна тIехула дара иза а. Филиалан куьйгалхочо Ванслова Екатеринас хIетахь дийцира, полисхоша тиша ноутбук а, флеш-карта а дIадьахьира, документаш дитира аьлла. Цо бахарехь, гIиллакхехь бира талламаш, тешаш чохь а болуш, низаман гурашкахь.
- Бакъоларъяран "Iазапашна дуьхьалояран Команда" организацино зорбане яьккхинчу "Арифметика пыток: Краснодаран кIошт" рапортехь Кубань хьалхара регион ю пачхьалкхехь. Деа шарахь зенаш хиллачаьргара шайга кхаьчна дIахьедарш зийначул тIаьхьа дийцина эксперташа, ницкъахоша лецначарна тIехь полицин дакъошкахь гIело латтош хиларх, ницкъахоша царна тIедожочух, мел дуккха хан оьшу бехктакхаман гIулакхаш дуьхьалдаха.
