Оьрсийчоьнан президенто тIеман "инарла-майоран" чин делла Нохчийчоьнан цIарах Пачхьалкхан думехь депутат волчу Делимханов Адамна. Цунах лаьцна хаамбира Кадыров Рамзана шен телеграм-каналехь.
"Йоккха авторитет" йолуш, "лараме" ву Делимханов – Нохчийчохь вевзина ца Iаш, доллу дуьненна а гIараваьлла стаг ву иза, йздина Кадыровс. Цо билгалдаьккхина, Оьрсийчоьно Украинана дуьхьал болийначу тIамехь цо дакъалацар а.
Оьрсийчоьнан Турпалхой а, инарлаш а бу ДелимхановгIеран кхуьй а ваша: "Оьрсийчоьнан бакъболу патриоташ бу уьш, шайн цIийца шаьш тешаме хилар тIечIагIдина цара", - билгалдаьккхина цо.
Делимханов – Кадыров Рамзанан ненехула гергара стаг ву, цуьнан цхьахволу уллора бIанакъост а ву. 1990-гIа шераш довш Ичкерин гIаттамхойн командир хилла Радуев Салман дIасалелош хилла ву иза. 1999-чу шарахь Оьрсийчоьнан эскарш Ичкерина тIелетачу заманчохь шен вежаршца цхьаьна, тахана мехкан урхаллехь волчу Кадыров Рамзанан ден Кадыров Ахьмадан агIор велира иза.
2006-чу шарахь Пачхьалкхан думин депутат хинверг шеконашка ийцира, Москвахь ФСБ-н подполковник, нохчийн "Ламанхо" тобанан командир, Кадыров Рамзанца девнехь хилла Байсаров Мовлади вийна цо аьлла. Иштта иза вузура ши ваша верца а – Оьрсийчоьнан парламентан депутат Ямадаев Руслан а, "Восток" батальонан хилла командир Ямадаев Сулим а.
2007-чу шарахь, Кадыров ханна президентан декхарш кхочушдан хIоттийча, республикин цIарах думехь депутат вира цунах, хIетахь дуьйна оцу статусехь а ву иза. Оцу йукъанна, ша депутат лаьттинчу 15 шарчохь, Пачхьалкхан думин низамаш дохучу базерчу хаамашца, 19 низамаш дахаран инициативийн бен автор а, соавтор а хилла вац иза. 2017-чу шарахь РБК ресурсо "тийна депутат" элира цунах: оцу шарахь парламентхочо цхьа а низаман проект йукъайаьккхина йацара, цхьана а коллегийн инициативех кхетта вацара, пленаран кхеташонехь дош аьлла а вацара.
Оьрсийчоь тIамца Украине чугIоьртинчул тIаьхьа оцу сохьта республикера дакъойх дIакхийтира иза. Кадыров Рамзанан "тик-токан" эскарийн командир олура цунах, билггалчу тIамехь политико дакъалаьцна цахилар, тылехь герз карахь кеп хIиттор къедош.
2021-чу шеран манагл-баттахь Оьрсийчоьнан политико Яшин Ильяс "пачхьалкхан уггар а кхераме депутат" ву иза элира.
- Тахана Делимхановн дуккха а болчу гергарнаш республикехь цхьамогIа даржаш дIалоьцуш бу. Цуьнан шича Геремеев Сулейман – Оьрсийчоьнан Федералан гуламан Нохчийчуьра декъашхо ву. Цуьнан вешех цхьаъ, Делимханов Алибек, Оьрсийчоьнан къоман гвардин Къилбаседа Кавказерчу эскаран гонан буьйранчан хьалхара гIовс, инарла-лейтенант, Оьрсийчоьнан Турпалхо ву; шолгIаниг, Делимханов Шарип, Нохчийчуьрчу МВД-н хадаран Урхаллин мехкадаьттан а, газан а объекташ ларъеш йолчу полицин полкан буьйранча, республикехула йолчу Росгвардин урхаллин куьйгалхо, полицин инарла-майор ву.
- Оьрсийчоьнан политик Немцов Борис вуьйш цо дакъалацаран тоьшалла дина дац, амма оцу гIуллакхехь масийттаза йаьккхира цуьнан цIе. Цуьнан вешига Алибеке а, гергарчу Геремеев Руслане а, Сулеймане а хеттарш дайта гIиртира адвокаташ, амма царех цхьа а кхеле ца веара.
- 2014-чу шарахь Американ финансийн министралло санкцеш кхайкхийра Делимхановна дуьхьал, "Братский круг" олучу зуламхойн тобанца и воьзна хилар а, узбекхойн криминалан хьалханчан Рахимов Гауфан омраца иза лелаш хилар а чIагIдора цара.
- 2022-чу шеран аьхка Делимханов Адамна дуьхьал рогIера санкцеш йехира, цо Украинерчу тIеман тийсдаоаршкахь дакъалацарна. Путинан политика жигара къобалйарна, къаьсттина Украинерчу тIамехь дакъалацарна а, 2022-чу шеран товбеца-беттан 22-хь Евроберто а санкцийн тептаре ваьккхира иза. И воцург, цуьнан вежарий Шарип, Алибек и кхечира тептаре.
- 2022-чу шеран гIадужу-баттахь Делимханов Адам а, цуьнан кхо ваша а Украинан санкцешна кIел нисвелира, пачхьалкхе оьрсийн чугIортарехь дакъалецначу наханна дуьхьал йаьхна йара уьш.
- "Коррупцица къийсам латточу Фондера" Навальный Алексейн накъосташа марсхьокху-баттахь "тIом марсабаккхархойн" тептар арахийцира, цига юкъахь ву Делимханов а. Тептар хIоттийнарш тешна бу, дерриг дуьненарчу нохчийн диаспоршна куьйгалла деш ву иза, "криминалан а, экономикан а потенциалах" пайда а оьцуш.
