Нохчийчоьнан куьйгалхочун кхерамзаллин сервисехь "деза дарж" делла 15 шо долчу Кадыров Адамна, хаамбина мехкан информацин министро Дудаев Ахьмада а, Орсийчочьнан парламентан депутато Делимханов Адама а. Ткъа шо хьалха шен ден Ахьмадан кхерамзаллин сервисан куьйгалле хIоттийра Кадыров Рамзан.
Кхерамзаллин сервисехь муьлха дарж делла 15 шо долчу республикин куьйгалхочун кIантана билгал ца даьккхина йа Делимхановс а, йа Дудаевс а, делахь а, информацин министро кхетийра, Адам хьакъ ву оцу дарже хIотто, хIунда аьлча, "динна тIехIотта кийча волу стаг санна" гайтина цо ша аьлла. Адам оцу дарже хIоттор "хила ма-деззара" ду аьлла Делимхановс.
2003-чу шарахь Кадыров Ахьмад Нохчийчоьнан президент хIоттийча президентан кхерамзаллин хьукматан куьйгалле хIоттийра цуьнан кIант Кадыров Рамзан. ХIетахь 27 шо дара цуьнан. Кхерамзаллин сервисехула чекхваьлла, Кадыров Рамзанан "аьтту куьг" лору Делимханов Адам а.
Оьрсийчоьнан низамашца а догIуш, 15 шо кхаьчна кхиазхойн бакъо йу "могушаллин зен ден доцчу" аттачу балха хIуттуш белхан контрактна куьгйаздан, белхан сахьташна доза а тухуш. Делахь а, Нохчийчоьнан куьйгалхочун кIант хьалха а билгалваьккхира, цуьнан хенаца богIуш боцчу кхиамашца. ГIадужу-беттан 25-чохь 15 шо долчу Кадыров Адамна "Кхарачой-Чергазийчоьнна хьалха гIуллакхаш дарна" орден йелира. Регионан лаккхара совгIат ду и, 20 шарахь шен корматаллехь кхьахьегначарна бен луш дац.
Карладаккхар: Нохчийчоьнан могушалла Iалашйаран министро Алханов Адама дIахьедира, 15 шо долчу Кадыров Адам "Нохчийчоьнан куьйгалхочун кхерамзалла латторна декъан" куьйгалле хIоттийна аьлла.
- Соьлжа-ГIаларчу СИЗО-хь Журавель Никитина йиттира республикан куьйгалхочун 15 шо долчу кIанта Кадыров Адама. Журавеля ша дIахьедира цунах лаьцна. ГIадужу-беттан 25-чохь Нохчийчоьнан куьйгалхочун телеграм-канале хIоттийра Журавельна йетташ, дIайазйина видео. Шен кIанта динчух дозалла до ша аьлла, дIахьедира Кадыров Рамзана.
- Нохчийчуьрчу полицино дуьхьало йира бехкзуламан гIуллакх доло – Нохчийчоьнан куьйгалхочун кIант жоьпалле озон йиш йац, иза дукха жима хиларна аьлла.
- ГIадужу-беттан 24-чохь ГIезалойчоьнан куьйгалхочо Минниханов Рустама шен куьга дIайелира Кадыров-жимахволчунна ГIезалойчоьнан "Дуслык" йеза орден – "къаьмнашна а, динашна а йукъара барт, машар а чIагIбарна аьлла". КIира хьалха мехкан Пачхьалкхан кхеташонан депутато Хамаев Азата массарна а хьалха дIахIоьттина, Соьлжа-ГIаларчу СИЗО-хь 19 шо долчу Журавель Никитина йиттинчул тIаьхьа Кадыров Рамзана шен кIантана Нохчийчоьнан Турпалхочун седа баларна ша реза цахилар дIахаийтира.
- Соьлжа-ГIаларчу СИЗОхь лаьцначунна йиттинчу Нохчийчоьнан куьйгалхочун кIантана Кадыров Адамна тIехIитта реза ца хилира ГIебарта-Балкхаройчоьнан а, Адыгейн а Iедалхой, къоман совгIаташ ца дира цара. Оцу кепара дехар кхаьчнера цаьрга Кадыров Рамзанан администарцин векалшкара.
