Нохчийчоьнан куьйгалхочун Кадыров Рамзанан 15 шо долчу кIантана Адамна "Кхарачой-Чергазийчоьнна динчу гIуллакхашна" орден йелла – регионан лакхара совгIат ду иза, шина дийнахь жимахволчу Кадыровна делла шолгIа совгIат а ду. Де хьалха, камерана хьалха СИЗО-хь лаьцна латточунна йиттинчу Адамна йелира ГIезалойчоьнан йеза орден а.
Нохчийчоьнан куьйгалхочун кIантана шолгIа орден йелла "къаьмнашна а, регионашна а йукъара цхьаалла кхиорна а, исламан ламастин мехаллаш чIагIйарна а". Цунах лаьцна Кхарачой-Чергазийчоьнан куьйгалхочо Темрезов Рашида дIахьедира шен телеграм-каналехь.
Орден йукъайаьккхина 2013-чу шарахь. Омраца а догIуш, иза кхачош йу 20 шарахь шен говзаллехь кхахьегначу бахархошна, цул хьалха пачхьалкхан кхин а цхьа совгIат цунна дина хиллехь, йа сийлахь цIе лелош иза велахь. Цул совнах, орденца цхьаьна 50 эзар сом а ду луш, тIера йасакх ца оьцуш.
15 шо долу Кадыров Адам лакхара доьшийла чекхйаьккхина а вац, Нохчийчохь цхьана а кепарчу даржехь а вац иза Кхарачой-Чергазийчоьнан бюджетера 50 эзар сом цунна лур ду йа дац, хаийтина дац.
ГIадужу-беттан 24-чохь Нохчийчоьнан куьйгалхочун Кадыров Адамна ГIезалойчоьнан "Дуслык" йезачу орденца совгIат дира – "къаьмнашна а, динашна а йукъара барт, машар а чIагIбарна" ГIезалойчоьнан куьйгалхочо Минниханов Рустама.
Цул а кIира хьалха оцу мехкан пачхьалкхан кхеташонан депутато Хамаев Азата массарна а хьалха дIахIоьттина, Соьлжа-ГIаларчу СИЗО-хь 19 шо долчу Журавель Никитина йиттинчул тIаьхьа Кадыров Рамзанан кIантана Нохчийчоьнан Турпалхо седа баларна ша реза цахилар дIахаийтинчул тIаьхьа. ТIаьхьо Хамаевс бехк цабиллар дийхира, цо ма-аллара, "вежараллин къаьмнийн йукъаметтигашна зен дийр долу" шен "эмоционале къамелана".
- "Дуслык" орден йала магош ду "ГIезалойчоьнан республикана гIуллакх дар" аьлла мидал йеллачул тIаьхьа. Цуьнца Кадыров Адамна совгIат динера аьлла хьалхо бина хаам бацара.
- КъорIан дагийна аьллачу шеконашца Журавель Никита лецира стигалкъекъа-беттан 21-хь. Талламан комитетан куьйгалхочун Бастрыкин Александран тIедилларца, гIуллакх билггал Нохчийчу дIаделира, шаьш "зен хилларш ду аьлла, дуккхаъчу Нохчийчуьра бахархоша дехарш дарна" аьлла, кхетийра цо цунах.
- Соьлжа-ГIаларчу СИЗО-хь Журавель Никитина йиттира 15 шо долчу республикан куьйгалхочун кIанта Кадыров Адама. Шен кIанта динчух дозалла до ша аьлла, дIахьедира Кадыровс Рамзана.
- Нохчийчуьрчу полицино таллам болийра, амма сацам бира – Нохчийчоьнан куьйгалхочун кIант жоьпалле озон йиш йац иза дукха жима хиларна.
- Кадыров Адамна Нохчийчоьнан Турпалхочун цIе йаларх гIадужу-беттан 6-чохь шен телеграм-каналехь хаийтира Пачхьалкхан думин депутато Делимханов Адама. Цо дIахьедира кхиазхочо дешарца а, спортехь а кхиамаш бахарх, хастийра иза дика кIант ву аьлла, амма совгIат хIун динчунна делла, билгал ца даьккхира.
