Кадыров Рамзанан шолгIа йоI, 23-шо Хадижат (Карина) Нохчийчоьнан администрацин куьйгалхочун хьалхара гIовс хIоттийна. Хьалхо иза Соьлжа-ГIалин школазхойн депортаментан куьйгаллехь йара.
Цунах лаьцна хаам бира Нохчийчоьнан куьйгалхочо шен телеграм-каналехь, администрацин урхалхочуьнца Таймасханов ГIаласца а, Хадижатца а хиллачу цхьанакхетарехь лаьцна луш. Инициативица вист хилира Таймасханов, Хадижата социалан декъан йукъаметтигашца жоьпаллехь хир йу аьлла билгалдоккхуш, ткъа Кадыровс “къобал дира йукъадиллина хаттар”.
Дахначу шарахь Хадижат а, цуьнан 18-шо долу ваша Кадыров Ахьмад а лахьан-беттан 30-хь йолийна гIуран беттан 12-чу дийне кхаччалц Дубаехь дIайехьначу климатан СОР28 самитан Оьрсийчоьнан делегатийн тобанан тептаран йуккъе дахара. Церан болх-некъ цхьана а кепара климат хийцайаларца боьзна боцушехь. Цига уьш бахар доьзна ду регионан куьйгалхочо шен берийн статус хьалайоккхуш, уьш политикан дахарна жигара йукъаийзош, аьлла билгалдаьккхира Кавказ.Реалии редакцино хеттарш динчу эксперташа.
ГIадужу-баттахь Кадыровс Хадижатана йелира “социалан сферехь лараме белхало” аьлла цIе. Оццу баттахь цуьнан цIийнда Алханов Адам, Нохчийчуьра чоьхьарчу гIуллакхийн министр лаьттинчун кIант, куьйгалле хIоттийра Нохчийчоьнан могушаллин министраллийн коьрте.
- 2016-чу шарахь Кадырова Хадижат "уггар а похIме" бер ду республикехь аьлла, къастийра дешаран министралло дIайаьхьначу регионалан "2016-чу шеран дешархо" конкурсан этапехь.
- Хадижат школазхойн дешаран департаментан хьаькам хIоттийра цуьнан 20 шо долчу хенахь 2020-чу шарахь. 2021-чу шарахь "Нохчийчоьнна беркате гIуллакхаш дарна" мидал йелира цунна. Ткъа 2022-чу шарахь регионан уггар а лакхара пачхьалкхан совгIат делира цунна – Кадыров Ахьмадан цIарах орден.
- США-н, Евробертан а, Японин а санкцийн тептаршка йазйина йу Кадырова Хадижат.
- Пачхьалкхан даржашкахь ду Кадыров Рамзанан бераш, йижарий, невцарий, йиша-вешин доьзалхой, шичой, маьхчой. Кавказ.Реалиин редакцино вовшахтуьйхира республикан пачхьалкхан структурашкахь белхаш бечу КадыровгIеран цIийнах болчех дуьззина тептар.
