Нохчийчоьнан куьйгалхочуьнца йоьзначу Absolute Championship Akhmat лиган латархо Ахъядов Ламберт лаьцна Iедало, Москван некъан административан инспекцин белхахо верна шеконашка лаьцна.
2022-чу шеран гIуран-беттан 31-хь вийна и стаг Москворецкан хин йистехь "Кхозуш долу Зарядье тIайн" гергахь, цигахь дIахIиттийна машенаш МАДИ-н инспекторо видео тIе дIайазйечу йукъанна, йаздо RTVI зорбано. Цхьайолу машен долахь йолчу стага инспекторна 16 чов йина уьрсаца, шен номершна цо сурт даккхарна, боху ВЧК-ОГПУ телеграм-канало. Инспектор меттигехь велла.
Чиллан-беттан 28-чу дийне кхачалц Ахъядов лаьцна латто сацам бина кхело, йаздо ТАСС пачхьалкхан агенталло. Хулиганалла лелорца стаг верна бехк биллина цунна.
Иэдинчу латаршкахула волчу спортхочо Ахъядов Ламберта 14 летаршкахь дакъа лаьцна, царах 9-хь толам баьккхина. ТIаьххьара латар 2019-чу шарахь дара цуьнан Absolute Championship Akhmat турниран лигехь.
Absolute Championship Akhmat (ACA) кхоьллина Соьлжа-ГIалара "Ахмат" а, "Беркут" а клубаш иэйарца, амма "Ахмат" клубан президент Нохчийчоьнан урхаллин таханалера вице-премьер Висмурадов Абузайд вара.
- Absolute Championship Akhmat лигана куьйгалла деш ву Хасиев Майрбек, хьалхо ФГУ "Нохчийн Республикан лоьрийн-социалан коьрта бюро" куьйгалхочун даржехь вара и. 2011-чу шарахь Хасиевна Кадыров Ахьмадан цIарх орден йелира, Нохчийчоьнан куьйгалхочуьнца уьйр йолуш ву и – масала, республикерчу зорбанаша Кадыровс Хасиев винчу денца декъалвеш хаам арахийцира.
- 2020-чу шарахь АСА Американ санкцийн тептаре йаьккхира, "Магнитскийн глобалан актан" бух тIехь, и лелабо Вашингтоно, адамийн бакъонаш хьоьшуш лелаш болчу наханна тIехьбевлла лелаш.
