Кхарачой-Чергазийчуьра къайлахчу сервисийн урхалло дIахьедина Черкесск гIалара 14 вахархо лацарх, исламистийн "Ат-такфир- валь-Хьиджра" тобанца воьзна хилла аьлла кхоллайеллачу шеконашца. И тоба йу бохург шеконашка дуьллу бакъоларйархоша а, талламахоша а.
Пачхьалкхан "Интерфакс" агенталло урхаллин векална тIетевжина хаамбо, лецнарш, урхаллин версица, боьзна хилла "Ат-такфир- валь-Хьиджра" тобано лелочуьнца, церан пропагандица а, ишта интернетехь а цхьаьна. Церан цIераш йохуш йац зорбанехь, оцу тобанехь цара хIун дакъа лоцуш хилла а хоуьйтуш дац.
Талламаш бечу заманчохь цаьргара даьккхина герз, хIоъ-молха а, "зIенан гIирсаш" а, "экстремистийн литература" а.
Лецначу цхьаболчарна дуьхьал бехктакхаман гIуллакхаш ийдина, экстремистийн организацин болх вовшахтохарна а, цу йукъахь дакъалацарна а, вукхарна дуьхьал гIулакххаш дахарх хаттар дийцаре деш ду.
- "Ат Такфир валь-Хиджра" организаци дIасайохийна Мисарахь шовзткъа шо хьалха, иза Оьрсийчохь экстремистийн йу аьлла, йихкина йара, делахь а, и хиларх шеконаш йу бакъоларйархойн а, талламхойн а. Бакъоларйархочо Давидис Сергейс бахарехь, "Ат-Такфир валь-Хьиджра" организацин декъашхой талламо "шайггара кхоьллина" бу. И вовшахтухуш дакъалацарна талламхоша бехкебо маьждиге лелаш боцу, официалан исламан Iеламчаш лоруш боцу нах. "Ат-Такфир валь-Хьиджран" тоххара хилла доктрина оцу тобанийн практикашца цхьанакхеташ хиларх материал хуьлу уьш бехкебан, экстремистийн организацихь дакъалаьцна аьлла.
- Товбеца-баттахь Къилбан гонашкара тIеман кхело набахтехь даккха пхийтта шо туьйхира Кхарачой-Чергазийчоьнан вахархочунна Игуменцев Дмитрийна, терроран тохар дан кечам барна а, "Ат-Такфир валь-Хьиджра" тобанца воьзна хиларна а.
- 2022-чу ушеран гезгамашин-баттахь Кхарачой-Чергазийчуьра Малокарачаевскан кIоштан кхело бехкевира меттигера пхи вахархо "Ат-Такфир валь-Хьиджра" тобанца йукъарлонаш лелийна аьлла, шина шарна тIера шина шаре эхашаре гергга хенаш йиттира царна. Оцу гаранан бу боху декъашхой лецарх хаамбора 2020-чу шеран гIадужу-баттахь. ХIетахь къайлахчу сервисаша дIахьедира "Ат-Такфир валь-Хьиджра" тобанца воьзна хилла аьлла, 20 гергга стаг лацарх Кхарачой-Чергазийчохь а, Дапгеставнехь а.
- 2021-чу шеран гIадужу-баттахь Кхарачой-Чергазийчоьнан НогIийн кIоштахь "Ат-Такфир валь-Хьиджра" тобанера ву аьлла бехкевина лецира пхи стаг.
- 2021-чу шеран гIуран-баттахь 25 шо долчу Ставрополера вахархочо Камнев Даниила дIахьедира, ницкъахоша тIехь ницкъ бина алийтира шега, терроран тохар кечдеш вара, шена бевзаш боцчу нахана бехкаш дахка, цаьрца цхьаьна "Ат-Такфир Валь-Хьиджра" тобанехь хилла ву ша алий боухш, хьийзош ву ша аьлла.
