Нохчийн пачхьалкхан "Грозный" телеканалан корреспонденто гайтина Белгородан кIоштара йохийна Козинка эвла. Дуккха а петарш шена чохь йолчу цIенна тIера хIоьънаша дитина Iуьргаш долуш, йохийна машенаш йолчу хьелашкара эвла а гойтуш, ЧГТРК-н белхахочо дIахьедира "Запад-Ахматан" кхиамех.
"Эвла тхан карахь йу", - боху, зорбанан министро социалан машане хIоттийначу видео тIехь, корреспонденто.
Сюжетехь чIагIдарца, йуьйцург йу Украинехьа тIемаш бечу лаамхойн дакъоша зазадокху баттахь Оьрсийчоьнан дозана чу кхача гIортачу хенахь бинчу тIемаша йитина тIаьхье. Бу царлахь Ичкерин агIончаш, Кадыровн рожана дуьхьалберш а. Хаамбора, цара Белгородан кIоштара Горьковский эвлан администраци схьайоккхуш дакъалацарх.
"Грозный" ЧГТРК-н белхахочо съемка йина Козинка эвла Горьковскийна 30 чакхарма гергга генахь йу. Оцу йукъанна корреспонденто хьахийра президентан харжамаш дIахьочу заманчохь дина тIелатар – харжамаш дIабахьарца дузура шайн тIелатар Ичкерин агIончаша.
- 2023-чу шеран мангал-баттахь вовшахтоьхна йу "Запад-Ахмат" батальон, цуьнан командир ву – Агуев Исмаил, Нохчийчура Куьрчала кIоштан полицин декъан хьаькам вара иза цул а хьалха. Оц даржехь иза хийцира цуьнан вашас Агуев Рустама. 2022-чу шеран бIаьста санкцийн тептаре йазвира иза Американ Цхьаьнатоьхначу Штаташа, кест-кеста адамийн бакъонаш хьешарна а, адамашка бала бахьарна а, бух боцу бехктакхаман гIуллакхаш дуьхьал дахарна а.
- Нохчийчоьнан куьйгалхочо зорбане хIоттийра зазадокху-беттан 13-чохь танк йохош йаьккхина видео, дIахьедира "Запад-Ахмат" тобано Оьрсийчоьнан эскаран кхечу дакъошца цхьаьна йухатохарх "кечдина доцу тIелатар" Харьковн кIоштаца цхьаьна долчу дозанехь. Де хьалха Нехотеевка эвлара дозанхойн дехьабовларехь йаьккхинера и видео – оцу дуьхьалойарехь "Ахмата" дакъалацар а ца хьахош, тIеман министралло зорбане баьккхира хаам.
- Украинехьа тIемаш бечу нохчийн Къаьстинчу батальонера (ОБОН) нохчийн тIемалоша дIахьедира зазадокху-беттан 14-чохь Оьрсийчохь "диверсин операцеш" йолийна шаьш аьлла. Стохка марсхьокху-баттахь тобанан ка йаьллера Белгородан кIошта кхача. ХIетахь тIемалоша герзаш диттира эскархойн машенна, вийра ши салти.
- Марсхьокху-баттахь тIелатар а дале хьалха Белгородан кIошта Iалашйан хьажийнера "Запад-Ахмат", амма уьш а дуьхьал хиллера дозанера позицешка хIитта.
