Подмосковьера "Крокус Сити Холл" концертан зал чохь йинчу терактана бехкехетарш лоцуш дакъалацарна махкара эскархошна совгIаташ дина аьлла, дIахьедина Нохчийчоьнан куьйгалхочо Кадыров Рамзана.
Буьйцурш бу тIеман министраллин "Ахмат-Россия" полкан декъашхой. "Уггар билгалбевллачарна", Кадыровс ма-йаздарра, 12 "Майраллина" мидалш а, урхаллин грамоташ а йелла.
Нохчийчоьнан урхалхочо билгалдаьккхина, шеконаш йерш лоцуш Брянскан кIоштахь ФСБ-н спецназ йукъахь йолуш дIайьхьна операци. Спецназан белхахошна совгIташ дарх хаийтина дац.
"Ахмат-Россия" полкан эскархой Брянскан кIошта хьовсийна дара Украинаца долу дозанаш Iалашдан.
- Подмосковьера концертан "Крокус Сити Холл" зал чохь байъинчу нахана тезетан де кхайхийра зазадокху-беттан 24-чохь.
- Бехкехетарш схьалохуш дакъалаьцначу Нохчийчуьра ницкъахошна Оьрсийчоьнан тIеман министралло совгIаташ дийр хиларх Нохчийчоьнан куьйгалхочо хаамбира зазадокху-беттан 23-чохь, "Крокусехь" теракт йинчу шолгIачу Iуьйранна. Шоьтан дийнахь иштта вистхилира иза Нохчийчоьнан Конституцин денца къам декъалдеш.
- Оьрсийчоьнан Iедалхоша чIагIдо, официалан хаамашца 13- стагана зулам деш, йинчу терактаца воьзна 11 шеконашца стаг лаьцна аьлла, ву царлахь теракт кхочушйина виъ стаг а. Лаьцначарлахь мел лахара а цхьанца ницкъахоша садизм лелош тоьшаллаш даржийра.
- "Ахмат-Россия" полкан куьйгалла деш ву Элимханов Заурбек. ГIадужу-баттахь Кадыров Ахьмадан цIарах мидал йелира цунна "ницкъаллин урхаллин билгалваьллачунна" санна. Полкан командир хIоттавале хьалха Элимханов болх беш хилла Гуьмсера "Оьрсийчоьнан спецназан университетан" куьйгалхочун гIовс санна – цигахь Iамош бу, Нохчийчуьра базехула Украинерчу тIаме хьийсон "лаамхой".
- Украинан эскара йукъара Интернационалан легионера нохчийн лаамхоша дIахьедира Белгородан кIоштара йуьртан администраци шаьш схьайаккхарх. Кавказ.Реалии сайто къастийра, хIун дакъалоцу Ичкерин агоIнчаша тIемашкахь.
- Нохчийн пачхьалкхан "Грозный" телеканалан корреспонденто гайтира Белгородан кIоштара Козинка эвлахь вуно йохийна меттигаш. Дуккха а петарш шена чохь йолчу цIенна тIера хIоьънаша дитина Iуьргаш долуш, йохийна машенаш йолчу йуккъехула ЧГТРК-н белхахочо дIахьедира "Запад-Ахматан" кхиамех.
