КъурIан дагорна бехкевеш волчу волгоградхочун Журавель Никитин гIуллакхехула Соьлжа-ГIалара дуьххьара кхел дIатеттина – бахьанаш лерина, и стаг Висаитовн кIоштан кхеле "схьа ца валор" а, зен хилларш цига ца бахкар а. Кху аьхка Журавельна къиза йиттира республикан куьйгалхочун кIанта Кадыров Адама, тIаккха и дарна Нохчийчоьнан Турпалхочун чин делира цунна.
Динехь болчу нехан синхаам сийсазбарна а, дине болчу цабезамна тIехула хулиганалла лелорна а артиклашкахула бехкево Журавель. Соьлжа-ГIаларчу СИЗО-хь латтош волу бехкевийриг кхеле ца валоран бахьанаш дуьйцуш дац.
Кхеле веъначу Журавелан адвоката "Кавказский узел" зорбане элира, тIаьххьара Журавельца ши кIира хьалха цхьанакхийтира ша. Цо бахарехь, рогIерчу хьолехь вара иза.
Кхелан гIишло чохь Журавелан да-нана дара, амма комментари йан дуьхьал хилира уьш, дуьйцу SOTA телеграм-канало.
Кхелан рогIера кхеташо гIадужу-беттан 13-хь хир йу боху.
- КъурIан дагорна шеконашкахь волу Волгоградан вахархо Журавель Никита лецира стигалкъекъа-беттан 21-хь. Талламан комитетан куьйгалхочун Бастрыкин Александран тIедилларца, гIуллакх билггал Нохчийчу дIаделира, шаьш "зен хилларш ду аьлла, дуккхаъчу Нохчийчуьра бахархоша дехарш дарна" аьлла, кхетийра цо цунах. Журавель Никитина йиттира марсхьокху-беттан 15-чохь Кадыров Адама иза Соьлжа-ГIаларчу СИЗО-хь волуш. Журавеля ша дIахаийтира цунах лаьцна. Гезгамашин-беттан 25-чохь Нохчийчоьнан урхалхочун телеграм-каналехь йаржийра цунна йеттачу хенахь дIайазйина видео. Шен кIанта динчух дозалла до ша аьлла, дIахьедира Кадыровс Рамзана.
- Нохчийчоьнан полицино дуьхьало йира Журавельна йиттинчу 15 шо долчу Кадыров Адамна дуьхьал бехкзуламан гIуллакх доло. Жоьпалле озон хан йац цуьнан аьлла, оцу буха тIехь дIатеттира цара дехар.
