Эскархойн рогIера тоба Украине хьажорах дIахаийтина Кадыров Рамзана. Соьлжа-ГIалара кема гIаьттина товбеца-беттан 25-чохь. Меттигера бахархой хилла ца Iаш, бу царлахь шайн лаамехь Оьрсийчоьнан кхинйолчу регионашкара баьхкина нах а цхьаьна, йаздина цо шен телеграм-каналехь. Тхан хьасташа хаамбира, политикан Закаев Ахьмадан вешин кIант Хьусейн а ву кадыровхойн тобанашлахь тIаме вахийтина аьлла. Цуьнца цхьаьна ву боху махкахь "бехкалавахна 200 стаг". Стенна уьш бехкебо, редакцина хууш дац.
Закаев Хьусейнна дукхазза операцеш йина, букъсуьртаца сингаттам болуш ву иза, чомахь хиъна Iалуш а вац. Церан гергарчара дийцира редакцига, стигалкъекъа-баттахь ницкъахоша Хьалха-Мартанхьа иза а, цуьнан ваша Бислан а лацарх.
Кавказ.Реалиин хаамашца, тобанхошлахь ву иштта, тоххара Нохчийчуьра муфтийн гIовс хилла Куруев Валид а. Иза а вара лаьцна, цуьнгара хIун даьлла хилла – хууш дац.
Дагадоуьйту, 39 шо долу Закаев Хьусейн лецира шен вешица Бисланца чоьхьарчу гIуллакхийн министраллина чуйогIучу Кадыров Ахьмадан цIарахчу 2-чу полкан эскархоша. Бислан тIаьхьо дIахецнера, Хьусейнан кхолламах хIуммаъ а хууш дацара.
- Украинан интернационалан легионан декъехь Нохчийн Ичкерия республикин тIеман ницкъийн ОБОН батальон кхоьллира стохка товбеца-баттахь Закаев Ахьмадан омраца. Цуьнан командир хIоттийра Зумсо Хьаьжа-Мурд. ХIара хIинцале а доьалгIа дакъа ду, Украинана гIоьнна дозанал арахьа бехачу Ичкерин агIончаша кхоьллина. ГIадужу-баттахь хаамбора, Закаевна дуьхьал бехктакхаман гIуллакх даккхарх, цо юттьюбехь батальон кхолларх видео хIотторна.
- 2022-чу шеран гезгамашин-баттахь Украинехь тIемаш бен махкара бахархой хьовсийра Кадыров Рамзана Закаев Ахьман вен. И дан ка йаьллачунна хьоле дахар хуьлуьйтур ду ша республикехь элира цо. Иштта Нохчийчоьнан урхалхочо чIир хьейира, Украинехьа болчу Ичкерин агIончашна. Товбеца-баттахь Украинан байракха бухахь тIемаш бечу батальонийн декъашхоша дIахьедар дира, Нохчийчохь Кадыровн рожана дуьхьал йаккха гIаттамхойн тоба вовшахтухуш ду шаьш аьлла.
