Талламан комитето бехкзуламан гIуллакх айдина Сулейманова Седа йарца доьзна – ахшо сов хьалха нохчийн ницкъахоша лачкъийна, Соьлжа-ГIала дIайигинера иза. Цунах лаьцна йаздина "СК SOS" кризисан тобано.
ДIахьединчарна жоп кхаьчна урхаллера - цу тIехь хаамбина, Нохчийчуьра йахархо "хууш доцуш къайлайаккхарна" бехкзуламан гIуллакх даккхарх, хьалхо бехказлонаш лоьхуш, жоьпаш кхоьхьуьйтура цара, кхетийна бакъоларйархоша. Кхин совдаьккхина хIума аьлла дац Талламан комитето.
26 шо долу нохчийн йоI Сулейманова Седа цуьнан гергарчийн дIахьедарца нохчийн ницкъахоша Санкт-Петербургехь стохка марсхьокху-баттахь лачкъийра. Даим лелочу кепах пайдаийцира йоьIан доьзало: цара бехкейира иза къола дарна, "низамашкахь" иза дIайигинера хеттарш дан. Цул тIаьхьа дуьйна цуьнгара кост хилла дацара.
- Санкт-Петербурган прокуратурехь дIахьедира, йоI шен лаамехь Соьлжа-ГIала хеттарш дайта дIа а йахара, шена лаарца цигахь саца а сецира аьлла. Урхалло ца хьахийра Нохчийчуьра ницкъахой, йоI лацар а санна.
- Гезгамашин-баттахь нохчийн омбудсменан Солтаев Мансура видео зорбане хIоттийра, шен Сулеймановаца цхьанакхетар хилар гойтуш. Амма цу тIехь йоIа дош ца олу; хIетахь дуьйна цунах лаьцна хаам хилла бац.
- Цул тIаьхьа Сулейманова къайлайаккхарх эзарнаш наха кехаташ кхехьийтира официалан урхаллашка, пикеташка буьйлура цуьнгахьа, Оьрсийчоьнан Iедалхошна оцу гIуллакхан йистйаккхар тIедожош.
