Нохчийчуьра 19 шо долчу полисхочун Халидов Ясинан адвокат Немов Александр вистхилла Оьрсийчуьра адамийн бакъонаш ларйан векал йинчу Москалькова Татьяне. Цо гIуллакх лелориг волу меттиг хууш бац стигалкъекъа-беттан 20-чуьра дуьйна – Казахстанца дозанехула пачхьалкхера аравала иза гIертачу заманчохь КПП-хь лаьцчахьана. Федералан омбудсмене дехар дина Немовс бакъоларйаран органашка цуьнан хьокъехь хеттарш дахьийта аьлла.
"Доьху шуьга ас Iалашвийриг лохуш гIо дахьара, аша оьшу барамаш тIеэцначул тIаьхьа векал йолчу пачхьалкхан органашка соьга хаамаш кхачабайта, маца, стенгахь, хьан лаьцна ву иза. Мича буха тIехь, стенга вигина ву иза",- хоьтту адвокато Москалькове дахьийтинчу кехата тIехь.
Хьалхо Немов Александр а, хаамийн гIирсаш а чоьхьарчу гIуллакхийн министраллин (МВД) урхалле а, прокуратуре а, Омскан кIоштара ФСБ а, МВД а, Росгвардин директоре (тIаьхьарчу хенахь цигахь гIуллакх деш хиллера Халидов) Золотов Викторе а бевллера.
Кавказ.Реалиин сайте адвокато дийцарехь, карарчу хенахь цхьана а урхалло тергам ца бина цуьнан дIахьедаран.
- Халидовх лаьцна стигалкъекъа-беттан 21-чохь зорбане даьккхира "Новая газета- Европа" гIирсан журналисто Милашина Еленас. Артиклехь йаздарца, шен 17 шо долуш дуьйна хилла Халидов Нохчийчуьра Шела кIоштан ОМВД-хь болх беш, цул тIаьхьа транспортан ОМОН-ехь. Ша болх бечу заманчохь йукъарло хилла цуьнан Нохчийчуьра экстремизмана дуьхьало латточу Центраца (Центр "Э") , иштта питанаш лелийна цо социалан машанашкахь.
- 2022-чу шеран гезгамашин-баттера схьа дуьйна Украинана дуьхьал болийначу тIамехь дакъалаьцна цо. Цул тIаьхьа сацам бинера цо, низамлардаран органашкара дIавала, амма куьйгалло и лаам къобал ца бира, кхерам тесира, терроризмаца доьзна шаьш бехктакхаман гIуллакх дуьхьал доккхур ду, нагахь санна, иза дIавала гIортахь аьлла. МуьтIахь цахиларна шеконаш кхоллайеллачу цуьнан хиллачу белхан накъосташа, "Новая газета-Европа" гIирсо ма-дийццара, "официалехь гIара ца доккхуш, дIалецира" иза.
- Зазадоккху-баттахь жимачу стага 1ADAT боламе Оьрсийчуьра араволуш гIо де аьлла дехар дира. Цуьнгара информаци шайна схьа ма кхеччинехь, жигархоша цуьнца йолу зIе хадийра. Украинехь маьршачу нахана, нохчашна зуламаш лелийначунна гIо дан шаьш декхарийлахь дац аьлла. Иштта 1ADAT-о цуьнан дийцар гIарадоккхуш, анонс йира. Йоккха резонанс йира оцу гIуллакхо Къилбаседа Кавказехь белхаш бечу бакъонашларйархошлахь. 1АДАТ-н жигархой тешна бара Халидов лацар шаьш цунах лаьцна гIарадаккхарна дац аьлла, цул хьалха дуьйна а иза лоьхуш вара боху цара. Ткъа 1АДАТ- боламо цунах лаьцна дIахьединчу бакъоларйархоша иза пачхьалкхера араваккха а ца хьоьвсира.
