Кадыров Рамзана дIахьедина, 26 шо долу шен вешин кIант Кадыров Хьамзат бахаман а, латтанийн а юкъаметтигийн министр хIоттор гергарлонца дац, цунах "тешам" хиларца доьзна ду. Керлачу даржехь иза хийцавелла Нохчийчоьнан урхалхочун кхечу гергарчуьнца – Ибрагимов Турпла-Iелица.
"Муьлххачу урхаллехь, мичча даржехь хиларх сайн гергарчаьргара жоп алсам доьхур ду ас…Суна жамI а, ша ца кхоош къахьегар а коьрта ду", - йаздина цо телеграм-каналехь, билгал ца даьккхина хIинццалц кхул хьалха а лаккхарчу даржашкахь хиллачу вешин кIанта хIун жамIаш гайтина.
2020-чу шеран чиллан-баттера схьа дуьйна Кадыров Хьамзата куьйгалла дира Нохчийчохь спортан а, кегийрхойн политикан а министраллин – оцу даржехь иза хийцира 2021-чу шарахь марсхьокху-баттахь Ибрагимов Турпал-Iелас. Мехкан куьйгалхочун вешин кIант пачхьалкхан "Чеченцемент" компанин коьрта директор хилира, ткъа стохка гурахь дуьйна Нохчийчоьнан урхалхочун секретариатан куьйгалхочхIоттийра.
- Кадыров Хьамзата дешна ЦIоьнтарарчу хьафизийн школехь. ТIаьхьо цо чекхйаьккхина Нохчийн пачхьалкхан университетан пачхьалкхан урхалла даран факультет.
- Нохчийчохь иттаннашкахь мехкан куьйгалхочун гергарнаш регионан Iедалан лаккхарчу даржашка хIиттабо. Йоллу урхаллин система Кадыровн Рамзана а, цуьнан гонерчу наха а дIалаьцна ю, оцу юкъанна шен доьзалхой карьерехь хьалхатеттарехь цхьана а кепара къовсам ца го цунна. Пачхьалкхан даржашкахь ду цуьнан бераш, йижарий, невцарий, вешин-йижарийн доьзалш, шичой. Кавказ.Реалии редакцино вовшахтуьйхира Кадыровн кланера пачхьалкхан структурашкахь белхаш бечех дуьззина тептар.
- "Мехкан да" титул йала тарло Нохчийчоьнан куьйгалхочунна – оцу кепара республикан Конституцихь хийцамаш бар хьехна парламентан спикеро Даудов Мохьмада а, кхин а 20 депутато а.
