Бертаза тIаме хьажочуьра ведда 25 шо долу Нохчийчуьра вахархо Гелагаев Мохьмад Швейцарин Iедалхоша психиатрин диспансере хьажийнера, ткъа бакъоларйархой йукъагIоьртинчул тIаьхьа – депортацин центре. Цунах лаьцна Кавказ.Реалиин сайте хаийтина къобалйазчу Ичкерин Швейцарера векало Мамишов Лачина.
"Мобилизаци бахьана долуш Нохчийчуьра араваьллера иза, Малхбален Европехула Швейцари кхаьчнера, цул тIаьхьа мухIажарийн куьпахь вара иза. Бутт гергга хьалха Мохьмад психиатрин дарбанан цIийне охьавиллинера – тIом болабеллачул тIаьхьа лазарш эха доьллера цунна, тIеман барзакъ долу нах байча вон а хуьлуш", - дийцина Мамишовс.
Хьолана йукъагIоьртира Швейцарера Ичкерин векал а, бакъоларйаран "Европера машаран цIа" организаци а, цул тIаьхьа дарбанан хIусамера араваьккхира Гелагаев, кхин а ши де даьлча депортацин центрехь дIатарвира, цигахь латтош ву кхин цхьа нохчо а – Батаев Iела.
Хьолан тергойар шайна тIелаьцна бакъоларйархоша, Гелагаевн хIусамненан дехарца гергарчу деношкахь цунна тIекхача дагахь а бу.
- 40 шо долу Батаев Iела дуккха а шерашкахь Украинехь Iийра, шайн пачхьалкхехь ваха бакъо а йеллера цунна. Амма Украинехь тIом болийча Европе дехьавала дийзира цуьнан. 2022-чу шеран гезгамашин-баттахь Швейцарин Iедалхоша лецира иза, хIетахь дуьйна депортацин центрехь ву. Товбеца-бутт йуккъе баьллачу хенахь мацалла кхайкхийра цо 30 денна. Карарчу хенахь 40 сов де ду цо мацалла лов. Цуьнан Нохчийчуьра гергарнаш болчу кадыровхой бахкарх дийцира бакъоалрйархоша.
- Берлинехь а, Стокгольмехь а митингаш хIиттийра Батаев Iела Оьрсийчоьне дIаваларна дуьхьал. Даймахка дIахьажон тарло иза, Батаев тешна ву, цигахь ша вуьйр ву аьлла.
- Оханан-баттахь Европерчу адамийн бакъонийн кхело (ЕСПЧ) Францин Iедале дехар дира, нохчо Т. Бувайсар Оьрсийчоьне дIавалар хенаца дIататта аьлла. Даймахкахь ши адам дерна бехке лоруш ву иза. Амма цуьнан адвокато и бехке хиларехь дерриге дийцина ца даьлла, тоьшаллаш оьшу боху. Иза дIалахь, оьрсийн Iедалан белхалоша цунна гIело йарна кхерам бу а аьлла.
