Луьрачу артиклашца 21 шо чохь йаккха хан тоьхна волчу Нохчийчуьрчу вахархочо Тангиев Тимура Удмуртерчу набахтешкахь нахана гIуллакхаш тIейаздарах, курхаллех, бакъонаш эшорах дуьйцуш, видеокхайкхам бина. Цо бахарехь, №5 колонехь тIаьхьарчу масех шарахь кхаа стага шайна тIе куьйг даьхьна, "уьш оцу хьола тIе баьхна" набахтин белхахоша, боху цо.
Оппозичерчу NIYSO телеграм-каналехула дира Тангиевс шен видео-дIахьедар. И видео арайаьллачул тIаьхьа Тангиев вийна хила тарло, цо ца дина зуламаш цунна тIейаздан хьовсур бу, аьлла дуьйцу видеон бухарчу йозанашкахь.
Канало "страховка" йу боху и видео. Тангиевс дуьйцу Удмуртерчу колонин белхахоша экстремизм, терроризм лелорна йолчу артиклашкахула харц гIуллакхаш делларх, тутмакхашкара ахчанаш дахарх а, нах лечу хьоле балош, хьийзорах а. Махкарчу ФСИН урхаллин хиллачу куьйгалхочунна Арсланов Михаилна хаа хууш, и дерриге лелийна ду аьлла тешна ву иза.
Шен видео-къамелехь Тангиевс дийцира, колонехь волчу цхьана белхалочух. Йетта йетташ, цхьана тутмакхашка кхечу тутмакхашна харц тоьшаллаш дайтинчу ФСБ-н "кураторах". Набахтерчу хьелашна резадоцуш, шайн бакъонаш эшорах аьрзнаш дечарна дийриг дийцира Тангиевс.
"Иза цара дукха атта до. СадаIа олий уьйтIа воккху стаг. Йуха кхо-виъ тIевогIу, цара цунна йетта. Набахтин куьйгаллина резабоцучарна, шайн гергарчаьрца цхьаьнакхетарш ца ло шайна, шайга телефон ца тухуьйту бохуш, аьрзнаш дечарна тIехь лелош ду и", – дийцира тутмакхо.
Махкарчу ФСИН-н урхалло цу хааман хьокъехь хIумма ца элира. Дайначу шарахь Инарла Арсланов Челябинск-махкара цхьатеррачу дарже дехьаваьккхира.
2003-чу шеран чиллин-баттахь Соьлжа-ГIалин вахархо а, ши миллиционер а верна бехке лерина вара Тангиев Тимур. Кхин а цунна бехке диллинера бандиталла, къоладар, герз лачкъор. 2004-чу шарахь кхело цунна 24 шо чохь йаккха хан туьйхира. Цуьнан гIуллакх йухалистича, хан 21 шарна тIе охьайаьккхира. Адвокаташа, кхелан коллегин болх харц лерира. Цхьана могIарерчу тешаша Тангиевна тIейаздина зуламаш дечу хенахь иза кхечу меттехь хиларна тоьшаллаш дира. 2013-чу шарахь ЕСПЧ-но 45 эзар евро ахча кхачийра Тангиевна, талламаш боьлхучу йукъанна цунна динчу таIзаршна компенсаци йеш - ницкъахоша шена йеттарах а, шен дегIана тIе йогу сигаьркаш Iиттарах а, шена ток йеттарах дийцира тутмакхо. Ша бехке хилар, шена таIазарш дича, тIелаьцна ша элира цо.
- 2022-чу шарахь Тангиевс Невран кIоштан кхеле а, Нохчийчоьнан Лакхарчу кхеле а № 2 йолчу Чернокозоверчу набахтина арз деш, 42 административан латкъам чубелира. Изза латкъамаш бира цо Нохчийьчуьрчу ФСИН-е а, МВД-га а. Цо дуьйцура, тутмакхаш муьлхачу хьелашкахь латтабо. Дукхахболу латкъамаш тIе а ца оьцуш, йухабахкийтира цунна.
- Къилбаседа Кавказехь тIемлой лоруш болчара кхелашкахь дIахьедо, шаьш мел дийцинарш шайга, ницкъбеш, дийцитийна ду олий, боху бакъонашларйархоша, адвокаташа а.
