Имам Гакаев Iабдурахьим верна бехкевечу Шамурзаев Турпал-Iелин гергарчу наха видео дIайазйина церан нахана лерина, йукъара вас дIайаккхар доьхуш. "ЧП Чечня" паблико йаржийна и.
ГакаевгIеран доьзале бистхилла Шамурзаевн гергарнаш, шайна гечдар доьхуш: "Гакаев вен дагахь шайн стаг вуй хиънехь, оха и сацийна хир вара. Дала декъалвойла шун стаг".
Социалан машанашкахь видео йаржийра, цу тIехь стаг верна бехкевечо боху ша тIелеттачуьнга, "вешигара совгIат" деана ша. Шамурзаевн гергарчара билгалдаьккхира, цуьнан вежарий цахилар.
- Нохчийчуьра Шелковскан кIоштара Воскресеновское эвлан вахархо Гакаев Iабдурахьим вийра кху беттан 14-чохь. Иза вехачу цуьнан керта а вахна, зуламхочо урс диттира цунна. Масех чакхарма дехьа жима кIант а ву лаьтташ цу видео тIехь.
- ШолгIачу дийнахь лецира иза вийна аьллачу шеконашца Шамурзаев Турпал-Iела. ГIуллакх шен тергоне эцна Талламан комитетан куьйгалхочо Бастрыкин Александра.
- ТIечIагIбазчу хаамашца, коьртаца лазар долуш хилла Шамурзаев, дарбанаш лелийна цо психиатрашна а, молланашна а тIеоьхуш. Гакаев дарбанаш лелош хилла боху, иштта вевзаш хилла хила тарло иза Шамурзаевна. Кавказ.Реалии сайто йаздира зулам дан цуьнан аравала хила тарлучу бахьанех лаьцна.
