Божаршца уьйраш йу аьлла шеконашца лаьцна хиллачу Соьлжа-ГIаларчу вахархочун Дадаев Ризванан Оьрсийчуьра дIаваха аьтто хилла. Цунах лаьцна хаамбина кризисан "СК SOS" тобано, церан белхахоша накъосталла динера цунна пачхьалкхера араволуш.
Стохка дечкен-баттахь Дадаевн доттагI зIене ваьллера "СК SOS" тобанца, цо гIо дехнера хIунда аьлча, Ризван кхоьруш вара цхьаьнга йаздан йуха а ша лацарна кхоьруш. Пачхьалкхера и жимстаг араваккха ка йаьлла: карарчу хенахь Европехь ву иза. Цо бахарехь, дика Iаш ву.
2022-шеран аьхка видео йаржийра Дадаев тIехь волуш, муьлш бу цахуучу наха, хьо гей ву ала бохуш, тIедожийра цунна. "СК SOS" тобанехь хаамбарца, курхалчаша йаьккхинера сурт хIоттош и видео. Интернетехь видео ца йаржориг ахча даккха гIоьртинера уьш. Хууш дац, шантаж йечарна цо ахча деллий, амма видео нахала йаьккхира цара. Цул тIаьхьа вайнера Дадаев. Бакъоларйархошна иза вийна хир ву аьлла хетара.
Ма-дарра дийцича, курхалчаш лецнера полисхоша. Дадаевс бахарехь, царна йетта а йиттинера, иштта бакъо йоцуш наркотикаш латторна царна дуьхьал гIуллайкх айдира. Кхин дIа хиллачух хууш дац.
Дадаев Соьлжа-ГIаларчу полисхойн декъан ларми чохь латтийнера 2022-чу шеран товбеца-бутт бовш чувоьллина лахьан-бутт йуккъе баллалц. Цо дийцарехь, цунна тIехь Iазап латтийначех цхьаъ вара Кадыров Рамзанан гергара стаг, Нохчийчуьра чоьхьарчу гIуллакхийн министран хьалхара гIовс Айдамиров Дени
Цул тIаьхьа Дадаев маьршаваьккхира, бакъоларйархойн болх бахьана долуш, иштта "лараме цхьа стаг йукъагIортарна" а – иштта верси йу лачкъийначун доьзалан. Хаамбо, и жимстаг дийна вуьтуш бинчу сацамна Кадыров реза хиллера бохуш.
- Бакъоларйархо Кочетков Игорь бакъоларйаран органашка ваьллера Дадаев схьалахар тIедожош, делахь а кхачам боллуш таллам ца бира.
- 2022-чу шеран товбеца-баттахь Дадаевца цхьаьна лачкъийра мел кIезиг а 16 нохчо.
- 2017-чу шеран аьхка а полицино лаьцна, тIехь ницкъбина вара Дадаев. Лапунов Максимца цуьнан гергарло ду аьлла, полицин тептарехь нисвеллера иза. Лапунов дуьххьара ву Нохчийчохь ЛГБТК+нахана тIехь къизаллаш лелорах лаьцна гIарадаьккхинарг.
