Шен йоккхаха йолчу йоIана Iайшатана Нохчийчоьнан халкъан артист цIе йелла Кадыров Рамзана. Цунна совгIат дIалучу барамехь цо дIахьедина, цунах иллиалархо ца хилла дела совгIат дина ша аьлла. Де хьалха 24 шо долу Кадырова, хIинццалц схьа министран даржехь хилла йолу, регионан вице-премьеран даржехь чIагIйира цо.
Соьлжа-ГIалахь дIайаьхьначу церемонин видео Кадыровс зорбане хIоттийна шен телеграм-каналехь. Халкъан артист хилар тIечIагIден кехат цуьнга дIалуш, Кадыровс элира: "Ахьмад-Хьаьжас (Нохчийчоьнан хилла президент – Кадыров Ахьмад. -Редакцин билгалдаккхар)" баьхнера, Iайшат артист хир йу. Цунах иллиалархо ца хиллехь а, сийлахь цIе мукъна а ло аса цунна тахана".
Иштта Кадыровс орденан II-чу барамера мидал йелла цунна "даймахкана хьалха декхарш кхочушдарна" , гезгамашин-баттахь Оьрсийчоьнан президентан Путин Владимиран омраца динера и совгIат.
"Регионехь кадрашха дIахIоттор ду и, регионан куьйгалхочун бакъо йу и. Кхузахь Кадыров Рамзана оцу шен бакъонах пайдаэцна", - дIахьедина Оьрсийчоьнан президентан пресс-секретаро Песков Дмитрийс, Кадырована цIе йаларх дуьйцуш "Подъем" гIирсана йеллачу комментарехь
Карладоккху, де хьалха республикехь вице-премьеран дарж делира Кадырована. ДIахьедира, керлачу белхан меттигехь цо социалан блоках жоп лур ду аьлла. Иза оцу дарже хIоттош сацам тIеэцнера меттигерчу министрийн кабинетан шуьйрачу кхеташонехь. Шайн хиллачу бертах дIахаийтира республикин премьеро Хучиев Муслима, ткъа Кадыров Рамзан, цуьнан телеграм-каналехь йаздина ма-хиллара, инициативана тIетайра.
- Iайшат – Кадыров Рамзанан йоккхаха йолу йоI йу. Шен 17 шо долчу заманчохь Firdaws модин цIийнан директор хилира цунах. 2009-чу шарахь цуьнан нанас Кадырова Меднис схьдиллина дара и. 2020-чу шарахь цкъа йуьхьнаца регионан культурин министран хьалхарчу гIовсан дарже хIоттийра иза, ткъа 2021-чу шарахь 22 шо долуш министр хилира цунах. Цуьнан хIусамда Мацуев Висхан кху шеран товбеца-баттахь республикин вице-премьер а, йуьртбахаман министр а хIоттийра.
- Кадырова Iайшат "культурин хьакъйолу белхахо" йу, иштта мидалш йу цуьнан "Адамийн бакъонаш Iалашйарна" а, "Нохчийчоьнна хьалха декхарш кхочушдарна", регион "кхиорехь дакъа лацарна" а совгIат дира мехкан 100 шо кхочуш, ДоттагIаллин орден йелира "ДНР" аьлла дIакхайкхийначу мехкан цIарах, иштта Нохчийчоьнан лаккхара совгIат а – Кадыровн орден.
- Американ Цхьаьнатоьхначу Штатийн а, Евробертан а, Японин а санкцийн тептаршкахь йу Кадырова Iайшат. Цул совнах Американ санкцешна йукъатоьхна Кадырова Iайшатан Firdaws модин цIа а.
- Нохчийчохь иттаннашкахь мехкан урхалхочун гергарнаш хIиттабо регионехь куьйгаллин лаккхарчу даржашка. Шен цIийнах болу нах хьалхатеттарехь, къийса хIума ца го цунна шена. "Сайн тешам берриг хIоттаво", - элира Кадыровс.
- Пачхьалкхан даржашкахь ду цуьнан бераш, йижарий, невцарий, йиша-вешин доьзалхой, шичой, маьхчой. Кавказ.Реалиин редакцино вовшахтуьйхира республикан пачхьалкхан структурашкахь белхаш бечу КадыровгIеран цIийнах болчех дуьззина тептар.
