Нохчийчоьнан къоман политикан, арахьарчу зIенийн, зорбанан, хаамийн министрана Дудаев Ахьмадна "Даймахкана хьалха хьуьнарш гайтарна" II тIегIан мидал йелла. Ишта омра арахецна бакъонийн хаамийн сайтехь.
Нохчийчоьнан куьйгалхочун гIоьнчан а, министран а даржехь волчу Дудаевна делла и совгIат "дуккха а шерашкахь даггара болх барна а, кхиамаш гайтарна а".
Кадыров Рамзанан уллерчу накъоста, Дудаев Ахьмада "Грозный" пачхьалкхан каналана куьйгалла дира, 2020-чу шарахь министран дарже хIоттийра иза. Оцу балхахь цо куьйгалла до меттигерчу пачхьалкхаан йерриг зорбанашна – масала, дайначу шеран гIадужу-баттахь цо дIахьедира, республикерчу журналисташа леррина курсашкахь дакъа лоцур ду, "хаамийн тIеман битамаш" Iамош. Журналисташца хиллачу цхьанакхетарехь Дудаевс элира, республикерчу зорбанийн белхахойн коьрта Iалашо – Нохчийчоьнан куьйгалхочун Кадыров Рамзанан "тешам" хилар ду.
2021-чу шеран гIуран-баттахь министрана Соьлжа-ГIалахь "Адамийн бакъонаш ларйарна" аьлла мидал а, "Оьрсийчоьнан патриот" билгало а йелира. Хьалхо Американ Цхьаьнатоьхначу Штатийн дуьненайукъарчу динан маршонан Комиссин рапортехь Вашингтонна хьийхира, хьаькамийн аккаунташна тIехь "сийсазалле къерахуьлуш видеош арахецарна" Дудаев Ахьмадна дуьхьал санкцеш йаха аьлла.
- 2019-чу шарахь Кавказ.Реалиина йеллачу интервьюхь Дудаев Ахьмада харцдора, республикехь нуьцкъаха бехказбийлийтаран практика йу бохург. Нохчийн Iедало "цхьанге а дехарш ца до, нуьцкъаха бехк ца биллар деха бохуш", хIунда аьлча, и низамо магош дац.
- 2022-чу шеран товбецан-баттахь Нохчийчоьнан зорбанан министро Дудаев Ахьмада "Первый каналан" журналист Куксенкова Ирина бехкейира республикан авторитет талхорна: "Тайра" цIарца йевзаш йолчу украинхойн парамедик йолчу Паевская Юлияца хийцина Нохчийчоьнан куьйгалхочун аннекси йинчу ГIирмерчу векалан гIовсан Саидов Мурадан кIантаца Саидов Адамца (Гриценко). Тамашена, цIена йоцу схема йу аьлла иза журналисто.
- Оппозицихойн Янгулбаев Абубакаран а, ИбрахIиман а нана Мусаева Зарема лачкъорна жигара комментареш йора Дудаев Ахьмада. Амма цхьа хан йаьлча сецира иза дIахьедарш дечура. ЦIерш ца йохуш, цхьаболчу, цо ма-аллара, "питанчашка" къамел дира цо – дуьххьара нохчийн а, тIаккха оьрсийн а меттанашкахь.
- Хьалхо Дудаев Ахьмада дIахьедира регионехь бехачу блогерийн "республикана а, къомана а хьалха декхарш хилар". Хьаькамна хетарехь, шайн социалан машанашкара агIонаш "хьалхатоьттуш" лелачу меттигера блогераш пайда оьцу Нохчийчоьнан куьйгалхочун Кадыров Рамзанан а, цуьнан гонерчу нехан а къинхьегамех.
