Нохчийчуьра эскархочунна Меджидов Шахьбанна бехкбуьллуш таIзар тIечIагIдина Къилбан тIеман гонашкара кхело – шеца летачу хенахь урс хьакха гIоьртина иза шен накъостана. Йукъарчу рожан хьелашкара колонихь даккха контрактхочунна кхо шо тоьхна, могушаллина доккха зен дарна.
ТIеман декъан спортзал чохь спарринг дIахьош хиллера эскархоша, аьлла ду зорбане баьккхинчу кхелан сацама тIехь. Дуьхьал тийсалучо садукъочу хенахь Меджидовс урс даьккхина, йалхозза тоьхна цунна. Важа ведда, бедарш хуьйцучу чохь къайлавала дагахь, амма цига а тIаьхьаваханера тIелеттарг цунна. Ша лелийнарг цунах ларвалар дара, шен дахарна кхерам латтарна аьлла, кхетийна цо кхелехь.
Шина а инстанцешкара кхелана оцу кепара бахьана шеггара кхоьллина хетта – волайнарг боксхойн каранаш доьхкина леташ хиллера, цуьнан могушаллина кхерам цо лахбора, ткъа Меджидов дуьхьал вала тарлора спортзале ваха, йа куза тIе буй тоьхна, латар сацон дезара, хьесап дина кхело.
Меджидов Шахьбана Украинерчу тIамехь дакъалацар а, тIеман ветеран иза хилар а, цхьана декъана бехкехиларна иза къера хилар а чоьте эцна, кхело колонихь даккха кхо шо хан тоьхна цунна, тIеман чинах воккхуш. Вуьшта набахтехь даккха итт шо гергга хан йогIура цунна.
- Контрактхо Горшков Сергей бехке лерира хулиганалла лелорна – 2023-чу шеран гезгамашин-баттахь къаьркъа меллачу эскархочо Толаман паркехь тIехбуьйлучу нахана герз кхийсинера. Набахтехь даккха ворхI шо кхачадора цунна, амма кхело арахь даккха цхьа шой ахшой тоьхна витира.
- Ростовера тIеман кхело бехказавоккхуш таIзар кхайкхийра контрактхочун Божко Алексейн хьокъехь. Иза бехкевинера меттигерчу йахархочунна йеттарна – дош дашера даьллачу хенахь Божкос мийрашца, буйнашца, гIожаца йиттинера зудчунна. Лоьраша тIечIагIдира корта а, аьрру белш а лазийна хилар, цуьнан дегIа тIера Iарждарш а. Кхело хьесап дира, "волайнхочунна дайн зен дан дагахь ца хиллера иза" аьлла.
- Новочеркасскера гарнизонан кхело шогачу рожан хьелашкарчу набахтехь даккха диъ шой, кхо буттий туьйхира Оьрсийчоьнан тIеман министраллин контрактхочунна Пряженников Николайна, шен белхан накъостана уьрсаца тIелатарна.
- Къилбан тIеман гонашкара кхело кIаддира Дагестанера вахархочунна Абасов Алибасана дина таIзар. Иза бехкевинера шен белхан накъост верна. Шогачу хьелашкара набахтехь даккха тоьхна 10 шо лахдира цхьана шарна – апелляцино чоьте эцнера вийнарг "бакъонна дуьхьал леларна". Шен белхан накъосташца цхьаьна нехан хIусам дIа а лаьцна цара, цигахь Магомедов фамили йолчо сийсаза къамелаш динера. Цунна жоп лучу Абасовс Калашниковн автомат йиттинера. Герзаца йина 28 чов карийнера Магомедовн дегIа тIехь.
