Нохчийчоьнан цIарах Оьрсийчоьнан парламентехь дупутат волчу Делимханов Адамна керла федералан совгIат дина – "Даймахкана гIуллакхаш дарна" IV-чу бараман орден. Оцу кепара омрана куьгйаздина Оьрсийчоьнан президенто Путин Владимира.
Шен телеграм-каналехь хаамбина Кадыров Рамзана Делимхановна орден йаларх лаьцна. Цо бахарехь, совгIат кхаьчна цунна "парламентаризм кхиорехь дакъалацарна а, низамаш дахарехь жигаралла гайтарна а, дуккха а шерашкахь хьанал къахьегарна а".
Парламентаризм кхиорехь а, низамаш дахарехь а цуьнан жигаралла стенца хилла, билгалдаьккхина дац. Пачхьалкхан думин информационан системин хаамашца, парламентехь тIаьххьара вистхилла Делимханов 2022-чу шарахь, 2024-чу шеран гезгамашин-беттан 17-чу дийнера схьа йоьдучу парламентан сессихь цхьана а кхажтасарехь дакъалаьцна вац иза, ишта иза а йукъахь волуш хилла низаман проекташ йовзуьйтура депутатийн тобанаша.
Кремлан сайтехь хIоттийна ду лахьан-беттан 6-чохь куьгйаздина президентан пачхьалкхийн совгIаташ дарх омра, Делимханов цу тIехь хьахийна вац. Бакъонан информацин пачхьалкхан порталехь тIаьххьарчу баттахь оцу тайпа сацам хIоттийна бац. Оцу йукъанна официалехь Путинан доллу омранаш дац зорбане дохуш.
- Делимханов Адам - Кадыров Рамзанан гергара стаг а, цуьунан гонера уллорчу накъостех а цхьаъ ву. 1990-гIа шераш довш Ичкерин гIаттамхойн командир хилла Радуев Салман дIасалелош хилла ву иза. 1999-чу шарахь Оьрсийчоьнан эскарш Ичкерина тIелетачу заманчохь шен вежаршца цхьаьна, тахана мехкан урхаллехь волчу Кадыров Рамзанан ден Кадыров Ахьмадан агIор велира иза.
- Делимханов Адам вузу бакъонашларйархошна а, жигархошна а, Нохчийчоьнан куьйгалхочунна луьйш болчарна а тIаьхьавийларна, иштта масех стаг цуьнан тIедилларца верца а. Уггар а гIарадаьллачу гIуллакхех дара – Оьрсийчоьнан оппозицин политик Немцов Борис 2015-чу шарахь Кремлан пенаш хьалха вер.
- Криминалца а, Украинана дуьхьал болийначу шуьйрачу тIамна а гунахь ву аьлла, Делимхановна дуьхьал йаьхна дуьненайукъара санкцеш. Оьрсийчохь 2022-чу шеран бIаьста пачхьалкхан "Турпалхо" аьлла седа белира цунна. Ткъа кху шарахь инарла-майоран цIе йелира цунна.
