Зазадокху-беттан 27-чу буса Къилбаседа ХIирийчоьнца долчу дозанехь полицин постана тIелатарна а, Малгобекехь полисхошца герзаш кхийссарна а бехке хетачу Коттоев Мовсаран ваша а, ши деваша а лаьцна ГIалгIайчуьра Малгобекан кIоштахь. ТIелеттачул тIаьхьа кхелхинера иза ша.
Лецначаьргахь карийна тIеман гIирс, лоьлхуьйтурш, хаамбо пачхьалкхан "Интерфакс" агенталло, ницкъаллин структурашкара шайн хьастанна тIетевжина, царна дуьхьал бехктакхаман гIуллакх даьккхина.
Иштта лецначех цхьаъ шеконашка эцна полицина тIелеттачарна накъосталла дина ву аьлла – Iедалхойн "Ингушетия" интернет-газетан хьостан хаамашца, 70 шо долу Коттоев Леча ву иза. Иза лацарх дийца даьккхира телеграм-каналаша оханан-беттан 4-чохь, ницкъахошна хетарехь, бехкебийраш кхаа дийнахь шен хIусамехь хьулбина хиллера цо.
Кхелхинчу Коттоев Мовсаран дакъа схьакарийра оханан-беттан 5-чохь Малгобекан-кIоштара Аки-Йуьртарчу дIатесначу цIа чохь, цуьнан четахь иккхинера граната. Де хьалха цуьнан дас, Коттоев Ахьмад-Гирис шен кIант дIакъастийра шех, и бохург ду, нагахь санна, цхьаммо иза вийна хIума хилахь а, шаьш чIир хьейийр йац.
- Зазадокху-беттан 27-гIа буьйса юккъе йахначу хенахь ГIалгIайчоьнан а, Къилбаседа ХIирийчоьнан а дозанехь бевзаш боцчу наха полицин постана тIе герзаш диттинера, цул тIаьхьа къайла а бовлуш. Шина полисхочунна чевнаш йира.
- Лаца кхайкхийра 6 стаг, царех цхьаъ, Эльдиев Рамазан, вийна карийра Карабулакехь, герзаш кхуьйсучу заманчохь лазийна хила тарлора иза.
- Оханан-беттан 3-чу суьйранна Малгобекехь полисхошна герзаш диттира муьлш бу цахуучу наха, хетарехь, полицин постана тIелеттарш хила тарлора уьш а, бехкехетарш лоьхуш бу ГIалгIайчохь. Полисхошна герзаш тоьхна, цхьаъ лаза а веш, къайлабевллера уьш а. Оцу кIоштахь контртерроран раж кхайкхийра.
- Оханан-беттан 5-чу буса Малгобекан кIоштара Зязиков-Йуьртахь диттира герзаш – кхо полисхо вийра, кхин а бархIанна чевнаш йира. Бехке лору виъ стаг ву лоьхуш.
