ТIекхочийла долу линкаш

 
Полицица хиллачу кхийсаршкахь дакъалаьцна ву аьлла хетачун деваша лаьцна ГIалгIайчохь
ЦIеххьана кхаьчна хаам!

Полицица хиллачу кхийсаршкахь дакъалаьцна ву аьлла хетачун деваша лаьцна ГIалгIайчохь


ГIалгIайчоь, Малгобек. Архивера сурт
ГIалгIайчоь, Малгобек. Архивера сурт

Къилбаседа ХIирийчоьнан а, ГIалгIайчоьнан а дозанерчу постехь зазадокху-беттан 27-чу буса тIелатарна а, оханан-беттан 3-чохь Малгобекехь полисхошна а герзаш диттина аьлла а бехкехетарш лоьхуш бу ГIалгIайчохь.

Iедалхойн "Ингушетия" интернет-газето хаамаш бинчу хьастана тIетевжина дуьйцу, хетарехь шеконе эцнарш тIехь хилла кхо машен карийна, Mash Gor телеграм-канало хьастана тIе ца тевжаш билгалдоккху, цхьахйолчу машенчохь оьккхуьйтург а, тIеман гIирс а карийна бохуш.

Иштта хаамбина, зулам дале хьалха оцу меттигехь – Малгобекан йистерчу фермеран хIусамехь гильзаш а, иштта бедарш а, молханаш, цIийн таммагIаш тIехь киса а карийна хиларх, цо а тоьшалла до боху, тIелеттачех цхьахволчунна чевнаш йина хиларан.

Оцу цIийнан хIусамда лаьцна, цхьахволчун деваша ву иза, Mash Gor телеграм-каналан а, Iедалхошкахьа йолчу анониман "Оперативные сводки" телеграм-каналан а хаамашца, 70 шо долу Коттоев Леча ву иза – лехамашка веллачу Коттоев Мовсаран деваша. Ницкъахойн версица, кхаа дийнахь бехкехетарш шен хIусамехь лечкъийна латтийна цо.

Оцу заманчохь Коттоев Мовсаран дас, Коттоев Ахьмад-Гирис, видео дIайазйина, шен кIантах дIахедаш."Фортангас" кхетадо, Коттоев Ахьмад-Гирин дIахьедаран маьIна ду, шен кIант вехь а, цунах ша чIир хьейийр йац бохург.

Карарчу заманчохь, тIечIагIбазчу хаамашца, лоьхуш ву пхи стаг. Махкарчу МВД-н урхаллин сайтехь а, телеграм-каналехь а Малгобекехь кхийсарш хиларх информаци йац.

Карладаккхар: Оханан-беттан 4-чу суьйранна ГIалгIайчоьнан куьйгалхочо Калиматов Махьмуд-Iелас дIакхайкхийра шен телеграм-каналехь махкарчу ФСБ-н а, МВД-н урхалхошца цхьаьнакхетар хиларх, цигахь дийцаредина контртерроран операци Малгобекан кIоштахь дIайахьарх лаьцна.

  • Оханан-беттан 3-чу суьйранна ГIалгIайчоьнан Малгобекан кIоштахь полицин белхахошна тIе герзаш диттинера муьлш бу цахуучу наха, цхьахверг лаза а веш, къайлабевллера уьш. КIоштахь кхайкхийна ю контртерроран операцин раж.
  • Зазадокху-беттан 27-гIа буьйса юккъе йахначу хенахь ГIалгIайчоьнан Наьсаран кIоштахь полисхойн постана тIе герзаш диттинера бевзаш боцчу наха, цул тIаьхьа къайла а бовлуш. Кантышево эвлан галморзехь ДПС-н пост тоьхначу меттигехь динера тIелатар. Mash Gor телеграм-каналан хаамашца, мел лахара а кхоъ хиллера тIелеттарг, уьш детин басахь йолчу ВАЗ-21099 машенахь хиллера. Виъ вара тIелеттарг бохуш, дуьйцура. Шина полисхочунна чевнаш йира.
  • Къилбаседа ХIирийчуьра ДПС-н постана тIелеттачех хила тарло аьлла, лаца кхайкхийна ГIалгIайчуьра вахархо Эльдиев Рамазан зазадокху-беттан 29-чохь велла карийра Карабулакехь. Пачхьалкхан "Интерфакс" агенталлин хьасташа дийцарехь, иза велла хила тарло герзаш дIасадеттачу хенахь йинчу чевнех.
  • Зазадокху-беттан 27-чохь ГIалгIайчоьнан МВД-н урхалло лаца кхайкхийра махкара кхо вахархо терроризмана бехке ву аьлла, шеконаш кхолалйелла, вара царлахь Эльдиев Рамазан а.

Оха хьоьхург

XS
SM
MD
LG