Ростоверчу Октябрьскан кIоштан кхело гIуллакх листина пехийн лазаран номер 19 (МОТБ-19) йолчу лазартнехь тутмакхашна тIехь къизаллаш лелорна. Кавказ.Реалии редакцин хаамашца, дарбан цIийнан куьйгалхочун гIовс лаьттинчу Лях Александрна 7,5 шо тоьхна колонехь даккха, психиатрин декъан куьйгалхочунна Позднякова Дарьяна чохь даккха йалх шо тоьхна, ткъа психиатр-лоьрана Поторочина Анастасияна – пхи шо. Массо а бехке бина шайгарчу бакъонел а совбийларна.
Чу воьллина а ца Iаш, кхело чоьхьарчу гIуллакхийн подполковникан чинах а ваьккхина Лях, ткъа Позднякова а, Поторочина а йаьккхина – лакхара лейтенантан даржех. Маьрша бевлачул тIаьхьа царна дихкина кхаа шарахь административан дарж а, дарбанан гIуллакх а лелор.
Жигархочунна, наркоктикийн гIуллакхашкахула колонихь даккха кхо шо тоьхначу, номер 19 йолчу лазартнехь ши кIира даьккхинчу Каклюгин Николайна хетарехь, гIело хьегийтарна бехке мел берш бац таIзаре хIиттйина.
"ХIокху гIуллакхехь зIе лакхара дIа йу: оцу хенахь МОТБ-19 дарбанан хIусаман коьрта лор хилла Мкртчян Тигран а, Ростовн кIоштара ФСИН-н йоллу дарбан хIусамийн куьйгалхо волу Пачганов Александр а вара бехкечаьрца хила везаш. ТаIзаре хIоттийна кхоъ – уьш берриш а бац оцу инзаречу сийсазаллина бехке болчех", - аьлла цо.
ЦIераш йаьхначу нахана дуьхьал бехкзуламан гIуллакх даккхийта хьийза Каклюгин 2021-чу шарера схьа дуьйна, иштта ФСИН-н медикийн-санитарийн декъан хьаькамна, полковникна Алексеенко Артемана а, лоьрана Орлов Александрна а. Стохка гIуран-баттахь гIуллакх доло дуьхьало йира мел кIезиг а йалхозза – лоьран латкъамехула керла таллам болийна хIинца.
Оцу гIуллакхехула волайнхой бу аьлла лерина ву 42 стаг, царех шиъ велла. Бехкаш дохкучийн агIоно бахарехь, Ляха Позднякована омра деш хилла цомгаш нах дIабехка олий, ткъа Поторочинас лоьрийн тептаре харц хаамаш йазбеш хилла.
Цул совнах, хало лайначара шайна йетта, кхерамаш туьйсу, йуург ца кхочуьйту бохуш латкъамаш бора.
Лях даржера дIаваьккхира стигалкъекъа-баттахь (кхечу хаамашца – гезгамашин-баттахь) 2021-чу шеран стигалкъекъа-баттахь дуьйна шен хIусамехь чохь латтош вара иза.
Позднякова Дарьина а, Потрочина Анастасияна а дIасайалар дихкина латтош йара.
- Iазапаш хьегийтинчу санитарийн гIуллакх къастийна толлуш ду. Цул совнах талла лерина бу МОТБ-10 дарбанан цIийнан коьртачу лоьран хьокъехь цо ледарло йалийтарна. Кхин а цхьа психиатр, цунна таIзар дар тIедожийна, волайнхочийн агIоно, реза хилла талламца йукъахь болх бан.
- Оцу гIуллакхехула кхел йина психиатрна Маркарова Ксенияна, кхел хилале хьалха барт хиллера цуьнан, шен хиллачу коллегашна дуьхьал мукIарло дан, цунна кхо шо хан тоьхна арахь йаккха, шина шарахь шегарчу говзаллица болх бан а доьхкуш.
