Оьрсийчоьнан президентехула адамийн бакъонаш Iалашйечу Кхеташонан декъашхочо Меркачева Евас дехар дина КъурIан дагийна аьлла, лаьцна латтон Журавель Никита Соьлжа-ГIаларчу талламан изоляторера пачхьалкхан кхечу регионера таIзар кхочушдаран Федералан урхаллин хьукмате дехьаваккха аьлла.
"Йукъараллин, политикан гIуллакхдархоша дечу къамелаша Журавель Никитина йиттина бохург тIечIагIдо…Доьху талламбар, иза лаьцна латточу заманчохь мича буха тIехь цунна тIебитина талламца боьзна а боцу, лаьцначу стагана тIебита низамашкахь бакъо йоцу нах", - йаздина Меркачевас шен кехата тIехь.
Шегара догIучунна политико, журналисто Литвинович Маринас кхайкхамбина Оьрсийчоьнан бахархошка, Журавельна йеттаран хьокъехь ФСИН-н куьйгалле, йа Госуслуги порталехула кехаташ дахьийта аьлла.
- Волгоградехь КъурIан дагош видео гучуйелира социалан машанашкахь стигалкъекъа-беттан 19-чохь. Оьрсийчоьнан Талламан комитетан куьйгалхочо Бастрыкин Александра омра дира Волгоградан кIоштахь КъурIан дагорах гIуллакх Нохчийчуьра талламхошка дIало аьлла. Дукха ца Iаш Журавель Соьлжа-ГIала валийра, цигахь "мехк кхел" йе цунна бохуш, кхайкхамашца тIеийцира иза меттигерчу бахархоша.
- Журавельна йиттина бохуш дийцадаьккхира марсхьокху-беттан 16-чохь – Нохчийчоьнан пачхьалкхан хаамийн гIирсаша зорбане даьккхира лаьцначо дина арз. Цу тIехь билгалдаьккхина, талламан изоляторе Нохчийчоьнан куьйгалхо Кадыров Рамзан веанчу хенахь, цуьнан 15 шо долу кIанта лаьцна латточунна йиттина мийрашца а, буйнашца а аьлла.
- Нохчийн лаккхарчу даржхоша пIераскандийнахь къобалдира Журавельна йеттар.
