Даиманна яйна хуьлуш йолу хIара телефон, цхьа ши бутт хьалха, ватсапехула дIасаяьржийнера. Цига дIатоьхча, шай байначу нахах дерг хуур ду аьлла, хаам бара кар-кара а луш дIасакхоьхьуйтуш.
Дийцарехь, Соьлжа-гIаларчу Зорбанан цIийнехь ю бохуш дара, байначу нехан спискаш. Шинарийн дийнахь, Iуьйранна дуьйна оцу меттехь, ткъех зуда яра. Зорбанан цIийна чу воьдучу неIара тIетоьхна кехат дара, и спискаш кху чохь ю бохург бакъ дац, уьш хилла а яц аьлла.
И къамел бакъ долуш санна дуьйцура цхьана жимчу стеган озо. Дийцарехь, 90 эзар нохчи, харцонца а, бакъонца а дIалаьцна волу, набахтешкара аравалийта кечвина ву бохура цо.
Жимачу стеган аз(ватсапехула): «Ассаламу Iалайкум, йижарий-вежарий. Зорбанан цIийнехь спискаш ю боху шуна, вай байначу нехан. КестолгIа уьш арабохуш бу боху. 90 эзар ца кхоччуш нохчий ву боху царна юккъахь. Масане хуьлу, воьвза-везарг а. Оцу Зорбанан цIийне а дахана, оцу спискашка хьаьжча, цигахь карор бара аьлла дара».
Бакъ хир дацара те бохуш, Зорбанан цIийна хьалха дукха зударий, къена а къона а, бераш а, майрой а, вежарий а байна болу, шаьш Iехийнийла ца тешаш бехха лаьттира.
Царна тIебаьхкира оцу гIишлонна гIароллехь лаьттарш а, бакъонашларъярхой а. И зударий кхето гIертара, амма, дукхачара тIе ца оьцура шайга дуьйцург.
Царах кхета а хала дац, сайтисам белла царна, бух бацахь а. Цундела, цхьана чIишалгалла бен иза бацахь а, цуьнах тасабеллера, сатийсам байна болу уьш.
Бакъонашларъярхо-журналист Саратова Хеда а кхаьчнера оцу метте. Цо Маршо Радиога дийцира, байначеран гергарчаьрна тIехь, и хIума лелош хилар.
Саратова: «Тахана соьга телефон а тоьхна, тIеехнера со цига. Зорбанан цIийнехь цхьа спискаш ю бохура. Со цига тIееъча, цара тахана бохуш дерг, и харц спискаш а яржош, и харц хIуманаш а дуьйцуш, шай иштта а доьхна долу дог, ма дохадахьара бохура. Массо а яьрташкара схьаихна бу и нах. Цхьанна а агIора, аьтто белахь, оцу нахах тхо лардахьара бохура цара».
Оццула халкъ гIатта а дина, бух боцу сатийсам царна бала а белла йолу зуда, цхьанна а гина а, я хезна а яц, я лакхахь ма гарра, телефон а болх беш яц цуьнан. Цо иза хIунда лелош ду, ца кхета ша боху Саратова Хедас.
Саратова: «Оцу зудчунна тIекхаьчна а, гина а стаг вац. Цунна тIекхочуш а вац цхьа а. Шен зIенаш а ю, шена и нах мичахь бу а хаьа бохуш, къамелаш до цо.
Иштта Зорбанан цIийнера а, цхьа хIума а дина араяьккхина ю бохура иза. Модийн цIийне дехьаяьлла иза. Чуьра вацахь а, шича-маьхча ванза цхьа а доьзал бац вай цIахь. Наха соьга телефонаш етта, бала бу-кх оцу нахехь баллош берг».
Лар йоцуш байначу нехан бала тахана Нохчийчохь уггаре а ира лаьттачарех бу. Официала хаамашца, мел лаххара а 5 эзар стаг ву царна юккъахь.
Амма юккъараллехь лелачу терахьашца, иза кхин а алсам хир ду. Тамашийна дерг ду, байна нах мичахь бу къастош ца хиларалла сов, декъий лохуш а махкахь беш блолх бац.
Стохка, генетикийн 60 паспорт деллера байначу нехан гергарчаьрга. Массийта шо хьалха, декъий къастош йолу лаборатории а йоьллура ю, аьлла дара. Оцу гIуллакхана Евроберто ахча луш дара, амма Оьрсийчуьрчу Iедалша хIинца а йист яккхаза ю.