«Исламан пачхьалкх» шайх олучу террорхойн тобанийн буьйранчалло интернетехула шена тIеэцна Францерчу Ниццехь пIераскан буса дина зулам. Цо дуьйцу, шен цхьана «эскархочо» кирлелош йолу машен тIехула а йохуш, дайина адамаш.
Бастилли яьккхина де даздеш майдана гулбеллачу нахах вийна зуламхочо 84 стаг, 200 сов лазийна ву.
ДАIИШан пресс-гIоьнчалло бахарехь, Ниццехь бинарг бекхам бу «пачхаьлкхаш цхьана а кхетта, ДАIИШ-ах летарна». 31 шо долу Тунисера схьаваьлла Францин вахархо Ляуэйж-Булэль Мохьамед ву машенца нах байинарг. Полицино зуламаш деш хьийза машен сацо гIертачу муьрехь герз тоьхна вийна иза.
Низамхоша хаийтина, шаьш хиламца доьзна 5 стаг лаьцнийла, царалахь Буэлелехь хилла зуда а йолуш.
Францойн телевизионашка террорхочун дас дийцира, шен воI цхьана а динан балаболуш а вацара, я маьждиге лелаш а вацара, аьлла.
Францерчу Ниццехь еарийн буса терактехь лазийначу нехан декъахь ю цигахь еха нохчийн йоI а. Цуьнан ший а ког каггийна, дуьйцу Ниццехь бехачу нохчаша.