Your browser doesn’t support HTML5
Соьлж-ГIалин аэропорто керла некъаш тохку, ткъа бахархой Магасе гIерта
Дуьненаюкъара терминал схьайоьллур Соьлж-ГIалин ВайнахАвиа дуьненаюкъарчу аэропортан урхаллин компанино. ВКонтактерчу шен агIон тIехь мехкан куьйгалхочо Кадыров Рамзана кхаарийдийнахь Iорабаьккхина и хаам.
Ишта-м кест-кеста хезаш ду бахархошна Iедалхошкара "цигий", "кхузий" керла рейсаш схьайиллина шаьш олий, амма дукхачу хьолехь, ша иштта дIа дийцар а хуьлий, дуьсуш меттигаш нисло-кх.
Башкортостанан бахархой цецбехира дукха хан йоццуш Кадыровс, Уфа Соьлж-ГIалара маршрут юкъайоккъур ю ша аьлла.
Ишта-м Ростов гIала а лелар ду кема аьллера.
Дуьххьара 2010-чу шарахь доладелира пассажирийн кеманаш Ростов-ГIала нах дIасалело, ишта Соче а, Симферополе а, Киеве а, Петарбухе а хехкалора уьш, амма деха ца лийлира, деса дIасалелар пайден ца хилла, юкъараехира авиарейсаш.
Карарчу заманахь Соьлж-ГIалин аэропортера денна гIоттуш ду Москох доьду 4 кема, ткъа пхоьалгIаниг доьду я Истанбуле, я Петарбухе, я Бишкеке я Мюнхене, кIиран дийне хьаьжжина нисло церан раж.
Стохка боккха къаъ бина, дIакхайкхийра, Соьлж-ГIалара Истанбуле дIасалела реза хилла шина авиакомпанин (Онур эйр, Пегасюс) кеманаш аьлла. Бакъдерг аьлча, цуьнах доккха хазахетар хиллера Нохчийчохь йохка-эцар лелочарна къаьсттина.
Амма мича бахьанашца къайладаьхьнехь а, йоккха юкъ юкъайолале, Онур эйр компанино барт бохийра аэропортаца бина болу.
Делахь а саццаза дIасалелаш ду Налчикера Истанбуле оццу компанин кема.
Хетарехь, луларчу регионийн бахархошна мел а эвсара, церан таронашка хьаьжжина хьелаш латточух тера ду аэропорташа.
Оьрсийчоьнан UTair компанино Соьлж-ГIалара Мюнхене рейсаш йо, амма шеконаш юьсу, хан ялале маршрут дIаяьккхина аьлла хезарг хиларан. Бухе теллича а, тIе ца кхуьу, стенна йиллина Нохчийчоьнан транспортан а, зIенан а министралло Мюнхене маршрут, хьанна ю иза пайден?
Европан пачхьалкхашкахь бехачу нохчашна мелхо а бегIийла хир дара, нагахь кема Брюсселе я Лондоне, Париже я Вене догIуш хилча. Цигахула баккхий аьттонаш бу кхечу кеманаш тIе хийжа а.
Цхьанатоьхначу Iаьрбойн Эмираташка а, СаIуда Iаьрбийчу а авиарейсаш хир ю аьллера 2011-чу шарахь Iедалхоша, амма оцу маршрутца доларчу кеманца Кадыровн а, цуьнан гергарчийн а бен дIасабаха аьтто ца хилира.
Делахь а, кху деношкахь "Air Arabia" авиакомпанино Соьлжа-ГIала - Шарджа (Iаьрбийн Цхьаьнатоьхна Эмираташ) маршрутан рожехь рейс юкъайоккхур ю шаьш аьлла кху бIаьста, кIиранчохь кхозза кема дIаса а лелуьйтуш.
Амма а хууш дац, цуьнан тIаьхье муха хир ю а, хIунда аьлча, Нохчийчуьра бахархой ур-аттал Москох а боьлху луларчу ГIалгIайчоьнан аэропортехула.
Цуьнан бахьанаш хаа лууш къахьега а ца ийшира. Маршо Радион зIе хилира махкарчу бахархошца: я дешарца, я белхан хьашташна кест-кеста кемана ховжа декхаре хуьлучу.
Щозза мехаш дестийна ду элира цара цхьабоса Соьлж-ГIалин аэропорто. 7- 8 эзар соьмал а дораха билет оьцийла дац цигахь, ткъа Магасехь 3 - 4 эзар сом бен ца долу.
Гуьмсерчу бизнес лелочу Маретан къаьсттина дукха нисло кеманца дIасалеларш. Цо а чIагIдира, ша даим а Магасехула Москох лелаш хилар а, ГIалгIайчоьнан аэропорташкахь беккъа дIа нохчий хилар а. Бахьана? Марета дийцира тхуна, шена хетарехь, бахьанех а.
Мотт оьрсийчуьнца иэбеш бийцира цо, делахь а оха хийцам боцуш довзуьйту цуьнца хилла къамел.
" Дорах ду-кх Магасера дIа билеташ. Даим а. Кхи дан хIума а доцуш, цхьа цаторийла хьан хийлахь, Магасера дIа яха билет ца кхочуш йисинехь, тIаккха лаахь а, ца лаахь а эца дезаш хуьлу Соьлж-ГIалара. Шозза сов мах а луш. Ас цхьа масал далор ду хьуна, карабогIучу баттахь Москох доьлхуш ду тхо белхан тобанца, оха хьалххе эцна-кх Магасера дIадаха тхайна билеташ.
3 эзар 400 бIе ца кхоочуш даьлла-кх тхан кеманца дIа а, схьа а доьлхург. Оццу кеманца, кхи даладелла хьелаш а ма ца хуьлу Соьлж-ГIалара доьдучун а. Я тхоьгахь дIоггара багаж а ца хуьлу, ур-атталла, чай, кофе ца ло мала, я хин стака а ахь мах дIа ца белча. ТIаккха стенна тIе луш бу и мах? " бохуш, ца кхеташ дийцира Марета.
Хууш дац, оццул къаьсташ деза мехаш стенна ду Нохчийчохь? Ала дац Соьлж-ГIалахь тIехиина воьдучу кеманчохь юург-мерг маьхза ю, ур-аттала хин тIадам а бойла дац, богIу мах дIа ца белча.
Цул совнах, пассажираша багаж схьаоьцу меттиг а бац кхин хотIе балийна. Тоххара, 40 шо хьалха санна, кхи хийцадаланза ду хьал.
ХIетте а дуьненаюкъара аэропорт санна статусе-м яьккхина Соьлж-ГIалин аэропорт.
Къилбаседан, Къилбан, Малхбален авианекъаштIехь уггар а транзите центр хир ю Соьлж-ГIала бохуш, зевне дIахьедарш до нохчийн Iедалша.
Къемата а ма хилахьара цунах транзитан центр, Мосхох лела кеманаш латто ницкъ тоьъча а дара доккха ниIма бохучохь ду, гарехь, сурт.
Ткъа хIинца юха керла хаам, Исламан символехь, дашочу ахбеттан битамехь а йолуш, политикан, экономикан, социалан доккхачу маьIнехь хир ю боху кеста схьайоьллур йолу дуьненаюкъара терминал мехкан куьйгалхочо,
Цул совнах, йоллу пачхьалкхехь уггар а тоьллачех, дуьненаюкъарчу стандартийн тIегIанехь хилийта Iалашонаш а кхобу шаьш боху.
Нохчийчоьнан Iедало керла-керла рейсаш схьа а йоьллуш, маршруташ шоръеш, царна цIен мехаш а хIиттош Iачу заманчохь, официалан статистикаца, масала, Дагестанехь дахначу шарахь хIаваъан кеманех пайдаэцна 1 миллион стага.
200 эзар пассажир чекхваьлла ГIалгIайчоьнан аэропортехула.
Буру-гIалан кеманаша 300 эзар ца кхоччуш пассажираш дIасалелийна.