Британехь еш йолу Rolls-Royce еза машенаш йохкар алсамдаьлла Оьрсийчохь кхушеран хьалхарчу 3 баттахь. Цунах лаьцна хаам бо "Автостат" талламан агенталло. Ерриг а Оьрсийчохь цу хена чохь йоьхкина цу маркин 24 машен.
Уггар дукха эцнарг ю 26 миллион соьмана тIера мах болалуш йолу Rolls-Royce Cullinan.
Дечкен-баттахь – Зазадоккху-баттахь йоьхинчу 24 машенах 13 лимузин эцна Москох а, Москох кIоштахь а, 3 – Петарбухехь а, 2 – Краснодаран махкахь.
Оханан-баттахь Экономикан лаккхарчу школо а, Внешэкономбанко а таллам бира Оьрсийчохь бехачу хьал долчу нехан хьокъехь. Цуьнан жамIашца а догIуш, Оьрсийчохь 3 процент нехан долахь бу 90 процент гергга бахам – ахча а, финансийн акитиваш а, кхин дерг а.
Хьал долчу нехан бахам дебаш бу тIедогIу рицкъ хьалха санна дацахь а. Оьрсийчуьрчу 20 процент бахархойн долахь дацара стохка 6 процент финансийн активаш а, 5 процент карахь лело ахча а бен.
The Wealth Report 2019 цIе йолчу дуьненаюкъарчу талламо гайтарехь, Оьрсийчуьрчу миллионерех кхоалгIа дакъа ду махкара дIадаха лууш. Царах 80 процент миллионераш хIинцале гIулчаш йохуш бу кхечу пачхьалкхан паспорт даккхар Iалашонца.