Федералан прокуратуро кхайкхам бина Iамеркан Цхьаьнатоьхначу Штатийн 1-чу Гонан аппеляцин кхеле юхатоха, аьлла Бостонерчу марафонехь эккхийтар динчу Царнаев ЖовхIара дина дехар, цуьнна кхел йиш бина сацам ницкъ болуш а буьтуш. Цунах лаьцна хаам бо CNN телеканало.
Federal prosecutors ask appeals court to uphold Tsarnaev conviction and death sentence @CNNI https://t.co/o8DvZw8aUm
— Radio Marsho (@radiomarsho) June 30, 2019
Прокурорша чагIдо, цхьа а озабезам ца беш, кхел ярна Царнаевн йолу бакъо ца йохийна бохуш, и суд Бостонехь, цо лелхийтарш диначу меттигана генадоццуш ярх. Прокуратуран векалшна хетарехь, Царнаевс шен бехктакхаман гIуллакхехула керла кхел яр дехар юхатоха деза.
Кхелехь дакъалаьцначу бехккъасторхошна цхьа а Iаткъам бина, аьлла ца хета прокурорашна, цул хьалха зорбанан гIирсашкахь цу гIуллакхах лаьцна дийцинчо.
CNN-о билгалдоккху Царнаевн адвокато Паттон Дэвида шаьш аппеляци яр телеканалана комментари а ца еш дитина хилар.
Маршо Радионо хьалхо яздина ма хиллара, Царнаевн адвокаташна хетарехь, бехктакхаман гIуллакх толлуш озабезамалла ца хилар кхочуш ца дина кхело дов хаттар и бохам хиллачу гIалахь дIа а даьхьна.
"Дина зуламан чулацам тидаме эцча, Бостонехь беха бехккъасторхой гIорасиз бара и дов къастош озабезам а ца беш сацам бан", - даладо NBC-но Царнаевн бехказваккхархоша динчу дIахьедаран дакъа.
Цул сов, Царнаевн векалша билгалдаьккхина бехккъасторхойх ши стаг бакъо йолуш вацара дов къастош дакъалаца, цара жюрин декъашхой хоржуш харц дерг дийцина хиларна. Ша аьлча, цара хьулдина хилла кхелахочух, Царнаевна тIехь къел ярх лаьцна социалан машанашкахь шаьш яздинарг.
Адвокаташна хетарехь, Царнаев ЖовхIар дика стаг ву. Ткъа терроран тIелатар дарна бехке ву цуьнан воккхаха волу ваша Царнаев Тамерлан.
2013-чу шарахь Бостонехь марафон йоьдуш лелхийтарш дира Царнаев Тамерлана а, ЖовхIара. Кхо стаг вийра, 264 стаг чевнаш йина вара. Царнаев Тамерлан вийра полисхоша, герз а тоьхна.
Царнаев ЖовхIарна вен кхел кхайкхийра 2015-чу шарахь. Iамеркерчу зорбанан гIирсаша хаам бира иза гIо дан реза хилла таллам беш, валлалц набахтехь яккха шена хан тохахь, амма талламхой реза ца хилира аьлла. Говзанчаш дийцарехь, латкъаман процесс яхъяла мега шерашкахь.
25 шо долу Царнаев латтош ву Iамеркехь уггаре чIогIа ларйеш йолчу Колорадо штатан Флоренция гIаларчу ADMAX набахтехь.