Нохчийчохь адамийн бакъонашкахула векал волчу Нухажиев Нурдис толлуш ду, Венехь Iедалша дIадаьккхина шен 6 беран бер юхадерзош гIо дахьара аьлла Шамсудова ПетIимата дина дехар. Цунах лаьцна хаам бо "Нохчийчоь тахана" агенталло.
Шамсудовас дийцарехь, цуьнан йоI Шамсудова Камета шен хIусамдеца а, берашца а Австрехь яха хиъна 2007-чу шарахь. 2018-гIа шо чекхдолуш меттигерчу Iедалша дIадаьхна церан бераш, ден-ненан сих-сиха девнаш дийларо ницкъ бо церан синӀаткъамна аьлла.
Омбудсмено Нухажиевс кхайкхам бина Австрерчу берийн бакъонаш ларъярехула пачхьалкхан политикан департаментан директоре, бераш юхадерзош накъосталла дар доьхуш.
Нухажиевс дийцарехь, да-нана дийна а долуш, Австрин Iедалша кхечу доьзалшка дIалуш ду нохчийн доьзалера бераш. Уьш дIадаха бух бацара аьлла хета нохчийн омбусменна, царна доьзалехь цхьана а кепара ницкъ беш ца хиларна.
Нухажиевс дагайоуьйту берийн бакъонех лаьцна йолу дуьненаюкъара Конвенци. Цуьнца а догIуш, ден-ненан бакъонаш дIаяьхна хилча, бераш дIадала догIуш ду церан юххера гергарчу нахе, боху Нохчийчуьрчу омбудсмено.