Еаридийнахь динчу зерашца, Iамеркан Цхьанатоьхна Штаташ хьалхарчу меттигехь ю, коронавирусан ун даьлла дукха нах хиларца. Вирус гучуяьллачу Китайл а хьалха ю Iамерка.
Worldometer сайтан информацица, таханалерачу дийнахь Цхьанатоьхначу Штаташкахь 82 эзар вахархо ву ун даьлла. Зазадоккху-беттан 27-чу дийнан зерашца, 1177 стаг велла цигахь, ткъа Китайхь 3287 вахархо кхелхина цу лазарх.
Еаридийнахь кхин 10 эзар стаг тIекхетта Iамеркехь. Велла 150. Къаьсттина чолхе хьал гойту Нью-Йоркехь. 37 эзар ву цигахь инфекцица. Калифорнехь а, Нью-Джерсехь а, кхечу штаташкахьчул а дукха бу коронавирусца Нью-Йоркехь. Iамеркан Цхьанатоьхначу Штатийн дуккхаъчу гIаланашкахь а санна, Нью-Йоркехь а карантин ю кхайкхийна.